И йикъара ДГТУ-дин муаллимрикай ва студентрикай ибарат делегация, гьа жергедай яз вуздин ректор Назим Баламирзоевни СтIал Сулейманан райондиз мугьман хьана. Университетдин векилар райондиз атунин макьсад, хабар гузвайвал, муниципалитетдин образованидин кьве идарада физикадай чирвилер къачудай лабораторияр патал тадаракрикай суьгьбетун, танишарун тир.
ДГТУ-дин делегация СтIал Сулейманан райондин кьилин заместитель Заур Къагьриманова, образованидин управленидин начальник Гьуьсейн Шихбабаева, райондин архитектурадин отделдин начальник Виталий Алисенова ва маса пешекарри къаршиламишна.
Гуьруьшдин вахтунда Назим Баламирзоева ДГТУ-да конструкторвилин бюро авайдакай ва ана муаллимрини студентри физикадай лабораторияр патал лазим тадаракар туькIуьрзавайдакай суьгьбетна.
Ада гьакIни къейд авурвал, къенин йикъалди технический университетди региондин 15-далай гзаф мектебар тадаракламишнава. «Чаз малум тирвал, алай вахтунда республикада технический пешекарвилерай тарсар гудай муаллимрин кьитвал, гьакIни ихьтин тарсар гунин еридихъ галаз алакъалу четин месэлаярни ава. Фикирзава, и серенжемди физика хьтин важиблу тарс чирунин, ахтармишунин рекье гьам муаллимар, гьамни мектебра кIелзавай аялар гьевесламишда», — лагьана вуздин ректорди.
Райондин администрацияди хабар гузвайвал, физикадин лабораторияр Агъа СтIалрин ва Шихидхуьруьн мектебрив агакьнава.
Делегациядик кваз райондиз мугьман хьанвай ДГТУ-дин физикадин кафедрадин доцент, конструкторвилин бюродин руководитель Марат Гьуьсейнова школайрин коллективар лабораториядин кIвалахдихъ галаз танишарна.
Идалайни гъейри, университетдин делегациядин Кьасумхуьре авай урус интеллигенциядин векилриз эцигнавай ва мукьвал вахтунда цIийикIа туькIуьр хъувун пландик квай памятник ахтармишна. Къейд ийин, вуздин пресс-къуллугъди хабар гузвайвал, и проектдал ДГТУ-дин архитектурадинни эцигунрин факультетдин муаллимри ва студентри кIвалахда.
Заур Къагьриманова школайриз пишкешар гъунай мугьманриз чухсагъул малумарна ва инлай кьулухъ Дагъустандин гостехуниверситетди образованидин и идараяр вичин къаюмвилик кутунайтIа лап хъсан жедайдакай лагьана.
Амина Муслимова
