50 миллион кубометр яд гьакьдай цин “Шурдере” гьамбархана ишлемишиз вахкунихъ галаз алакъалу яз тахминан 200 агъзур кас яшамиш жезвай Кьиблепатан Дагъустандин мулкар таъминарун, гьакIни ана, кьилди къачуртIа Дербент, Дагъустандин Огни шегьерра, Белиж поселокда авай дигидай системайрив яд агакьарун мумкин кар жеда.
РД-дин Гьукуматдин Председателдин заместитель Абдулмуслим Абдулмуслимова и йикъара “Шурдере” гьамбархана ачухунин месэладиз талукьарнавай совещание кьиле тухвана.
Ада къейд авурвал, винидихъ къалурнавай объект ишлемишиз вахкуни Дагъустандин кьиблепата авай гьам экономикадин объектар, гьамни 25 агъзур гектардин чилерал экIя хьанвай хуьруьн майишатдин никIер (ципицIлухар, багълар, майваяр цанвай чкаяр) ара атIунар авачиз целди таъминардай мумкинвал гуда.
“Цин гьамбархана Самур вацIай къачудай целди ацIурда, ахпа яд йисан кьиляй-кьилиз Мегьарамдхуьруьн, Сулейман-Стальский ва Дербент районрин мулкарилай физвай дигидай цин Самур-Дербент къаналдиз (адан яргъивал тахминан 100 километр я) ахъайда.
Самур-Дербент къанал михьуни ва “Шурдере” гьамбархана эцигуни агьалияр чилер гьялиз башламишунал гьевесламишнава. Гьеле Самур-Дербент къаналдай “Шурдередиз” яд агакьардай къанал туькIуьриз башламишайдалай инихъ алатнавай вахтунда адан патарив 500 гектар майданра уьзуьмлухар кутунва”, — къейдна А.Абдулмуслимова.
Совещанидал къейд авурвал, 2023-йисуз объект ишлемишиз вахкун патал са жерге кIвалахар тамамарна куьтягьун лазим я, кьилди къачуртIа, алава пуд переезд, сеткадин жугъун, дизелдин электрогенератор ва аварияр хьайи вахтара лазим жедай тадаракрин запасар эцигдай кIвал, хуьрерин къеняй тефидай рекьер туькIуьрун ва са жерге маса инженервилин кIвалахар тамамарун лазим я.
И ва маса месэлаяр веревирд авурдалай ва нетижаяр кьурдалай кьулухъ А.Абдулмуслимова Шурдереда цин гьамбархана эцигунихъ галаз алакъалу яз арадал атанвай чилерин месэлаяр гьялунал машгъул жедай пешекаррин десте тешкилун тапшурмишна.
Идалайни гъейри, РД-дин чилерин ва эменнидин алакъайрин рекьяй министерстводи Мегьарамдхуьруьн райондин администрациядихъ галаз санал мулкунин кадастрдин пландал чилерин участокар къалурунин схемаяр тестикьарунин ва чилерин участокриз талукь къарарар кьабулунин,
Табасаран, Сулейман — Стальский, Мегьарамдхуьруьн, Кьурагь, Хив районрин кьилерал РД-дин Минимуществодив арадал къвезвай чилин участокдиз талукь заключенияр агакьарунин кIвалахдик тади кутун тапшурмишнава.
«Лезги газет»
