Республикада 1-сентябрдиз 2,3 агъзур ученик патал чкаяр авай цIийи 9 мектебди ва аялрин са бахчади чпин ракIарар ачухда. Идан гьакъиндай ТАСС-диз Дагъустандин образованидин ва илимдин министерстводин пресс-къуллугъди хабар гана.
“Чирвилерин югъ тир 1-сентябрдиз Дагъустанда, адет хьанвайвал, шадвилин гьалара образованидин цIийи идараяр кардик акатда. Кьилди къачуртIа — цIийи 9 мектеб ва аялрин са бахча”, — лагьана пресс-къуллугъдин векилди.
Адан гафаралди, аялрин цIийи бахча Каспийск шегьерда ачухда. 280 касдиз чкаяр жедай аялрин и идара “Образование вилик тухун” госпрограммадин сергьятра аваз эцигнавайди я. ЦIийи мектебар республикадин 9 муниципалитетда ачухда. Анра 2 агъзурни 294 ученикдиз чкаяр жеда”, — хабар гана агентстводин векилди. Ада мадни баян хгайвал, гьар сана 300 касдиз чкаяр жедай кьве мектеб Хасавюрт райондин Теречное ва Кандараул хуьрера, 120 чкадин са мектеб Акбулатюрт хуьре кардик акатда. Гьар сана 100 ученикдиз чкаяр авай мектебрин дараматар Хунзах райондин Шотода ва Тлайлух хуьрерани ачухда. “Къаякент райондин ЦIийи Викри хуьре — 320 чкадин, Сулейман — Стальский райондин Кьасумхуьрел — 150 чкадин, Къизилюрт райондин Миатли хуьре 200 чкадин мектебар ачухда. Махачкъалада лагьайтIа, 26-нумрадин СОШ-дихъ 604 ученикдиз чкаяр жедай дарамат гилиг хъувунва», — лагьана ведомстводин векилди.
И имаратар «Образование вилик тухун» госпрограммадин, республикадин инвестицийрин программадин ва «РФ-дин гражданар тIем акакьдай ва къулай яшайишдин кIвалералди, коммунальный къуллугъралди таъминарун» госпрограммадин сергьятра аваз эцигнавайди я.
“Вири санлай Дагъустанда 2020-йисан эхирралди 9 агъзурни 74 чка авай 33 мектеб ва аялрин 58 бахча ишлемишиз вахкуда”, — лагьана эхирдай агентстводин векилди.
«Лезги газет»
