РД-дин Гьукуматдин Председателдин заместитель Нариман Абдулмуталибова къейд авурвал, 2023-йисуз Хасавюрт, Каспийск, Кьиблепатан Сухокумск, Буйнакск шегьеррин сергьятра авай зирзибилри кьунвай майданар (30 гектардилай виниз мулкар) къайдадиз хкун (рекультивация) патал федеральный бюджетдай саки 1 миллиард манат пул чара авунва.
Ада къейд авурвал, зирзибилри кьунвай чкаяр рекультивация авурдалай кьулухъ а чилер гележегда абурухъ гелкъуьн ва анжах талукь тир макьсадра ишлемишун патал чкадин гьукумрив вахкуда.
Вице-премьерди алава хъувурвал, алай вахтунда зирзибилар терг авунин кIвалах тайин графикдин бинедаллаз кьиле физва, юкьван гьисабдалди, умуми кьадардикай 13-15 процент кIвалахар акьалтIарнава.
Гьазурайди — Муса Агьмедов
