Вирироссиядин ватанпересвилин “Ватандин Игитар” вахтадин сергьятра аваз Ахцегьа кьиле фейи мярекатда РФ-дин Игит, Россиядин ФСБ-дин от­ст­ав­када авай полковник Мегьамед Гимбатова, РД-дин милли сиясатдин ва диндин крарин рекьяй министрдин заместитель Арсен Магьмудова, “Ахцегь район” муниципалитетдин кьилин везифаяр тамамарзавай Роберт Гьамзаева, райсобранидин председатель Абдул-Керим Палчаева, РВК-дин ­комиссар Рафик Мегьамедова иштиракна.

Ватандин ЧIехи дяведа фашистрихъ галаз женгера телеф хьайи ахцегьвияр эбеди рикIел хуьнин лишан яз хкажнавай обелискдал цуьквер эцигайдалай кьулухъ мугьманар райцентрадин школайрин чIехи классра кIелза­вай аялрихъ галаз гуьруьшмиш хьана. Мярекат, мугьманар тебрикуналди ва жегьилар РФ-дин Игитдихъ галаз гуьруьш хьунин “Ватандин Игитар” чIехи проектдин (Да­гъустанда гила кьуд лагьай сеферда кьиле тухузва) важиблувал къейду­нал­ди, Роберт Гьамзаева ачухна. Мярекатдин мирзевал авур рай­ондин культурадин управленидин начальникдин заместитель Сулейман Сулейманова гаф Игит Мегьамед Гимбатоваз гана. Ада куьрелди вичикай, алай четин­ девирдикай, жегьилар гъве­чIи чIа­валай хизанда, школада ватанпересвилин руьгьдаллаз тербияламишунин важиблувиликай итижлу суьгьбетна.

— Куьне хуьруьн обелиск хуьзвай, адахъ гелкъвезвай жуьре акурла, ри­кIиз хуш хьана, — лагьана Гимбатова.      — Им куьне Ватан патал чанар къурбанд авур баркаллу бубайрин игитвал эбеди­ авунин, милли тарих, чIал, адетар, меде­­ният хуьзвайвилин лишан я. Сагърай! — башламишна ада вичин суьгьбет.  — Жувакай рахайтIа, са вахтунда зун­ни куьн хьтин хуьруьн адетдин жегьил тир.           9-класс акьалтIарна, ПТУ-да тракторист­вилин, шофёрвилин пеше къачуна. Советрин Армиядин жергейра шофёрвал, хуьруьн совхозда тракториствал аву­на. Амма гъвечIи чIава­лай зи рикI килигай кинойрин таъсирдикди разведчик хьунал алай. Анжах гъавурда акьурла акуна хьи, жуван къаст кьилиз акъудун патал чирвилер авач. Заочнидаказ 11-класс акьалтIар хъувуниз, художест­венный ктабар кIе­луниз, рикIивай спортдал алахъуниз мажбур хьана. Гьа са вахтунда галаз-галаз пуд йисуз ФСБ-дин разведшколадик экечIун патал арзаяр кхьена. Эхирни гьазурлухвилин курсуниз кьабулна. Ахпа галатун тийижиз алахъна, разведшколани, высший военный училищени лайихлудаказ куьтягьна. Гьа им зи уьмуьрдин кьилин сифте игитвал хьана. Гьа­къисагъ зегьметдалди вилик эцигнавай мурад-къаст кьилиз акъудзавайди, Ватан хуьнин буржи тамамарзавайди игит я. Алай вахтунда чпин хушуналди СВО-да нацистрихъ, фашистрихъ галаз женг чIуг­вазвайбур вири игитар я.

Игитар зегьметди арадал гъизва. Хизандани школада ивидик ватанпересвал, игитвал кутазва. Алай вахтунда уьлкведиз мягькем, жуьрэтлу ксар герекзава. Гаджетрал машгъул жемир, наркотикри хьиз, абуру куьн уьлендиз чIугвазва. Зигьин, чIал ачухарун, чирвал артухарун патал художественный ктабар гзаф кIела.

Ватанпересвилин тербиядин ачух тарсуниз элкъвей гуьруьш суал-жавабдин тегьерда мадни итижлудаказ кьиле фена.

Жегьилрихъ галаз гуьруьшдилай кьулухъ мугьманри махсус серенжемда игитвилелди телеф хьайи Тамерлан Ильясован (адаз кьейидалай кьулухъ “Жуьрэтлувиляй” орден гана) ди­де-бубадал кьил чIугуна, женгинин залан хер алаз хайи ватандиз хтанвай Эрзиман Асаеван гуьгьуьл къачуна. “Ватандин Игитар” вахта гьакI тарихдин музейдихъ ва килигуниз лайихлу маса чкайрихъ галаз таниш хьуналди давам хьана.

Дашдемир Шерифалиев