Алай йисан юкьвара аялринни жаванрин Ахцегь районда авай реабилитациядин центрадиз Москвада яшамиш жезвай ватандаш Шихмегьамед Мурсалован теклифдалди мергьяматлувилин “Леки” фондунин векилри куьмекар гун хиве кьурдакай чна хабар ганай.
“Лекидин” векилар тир Фарман Шайдабегов, Зейнидин Абилов, Сулейман Сулейманов аялрин махсус и центрадиз фена, регьбердихъ, ана авай аялрихъ, шартIарихъ галаз таниш хьанай ва суьгьбетар авурдалай кьулухъ абуру чпин патай аялри ишлемишдай мебель ва ДЦП авай аялар къекъвез вердишардай махсус тренажёр гуз чалишмиш жеда лагьанай.
ЦIийи йисан вилик аялринни жаванрин Ахцегь районда авай реабилитациядин центрадив савкьат агакьна. “Лекиди” хиве кьур нубатдин кIвалах кьилиз акъудна, набут аялрик гьевес кутуна. Сагърай чеб! Махсус и центрадин директор Мирвара Мусанабиевади “Лезги газетдин” редакциядиз мергьяматлувилин “Леки” фондуниз сагърай лугьузвай чар ракъурнава. Агъадихъ чна ам гузва.
Дуьнья хъсанвилихъ дегиш жедай, эгер ана хъсан ксар гзаф жез хьайитIа…
Майдин вацра мергьяматлувилин “Леки” фондуниз за чи центрада авай аялриз алакьдай куьмек авунин гьакъиндай талукь тирвал арза авунай.
Гежел вегьин тавуна чкадал фондунин активист Фарман Шайдабегов атана ва аялри ишлемишдай мебель, гзаф терефрин “Гроссан тренажёр” гунин меслят хьанай. Фондуни пул кIватIунин серенжем тешкилна. Са куьруь вахтунда регьимлу ксарин куьмекдалди герек кьадар пул кIватIна. Инвалидрин международный йикъан вилик мергьяматлувилин “Леки” фондуни чи “кьетIен” бицIекар цIийи 18 кровать, абурун патав жедай тумбочкаяр ва набут жаванриз чарасуз герек “Гроссан тренажёр” пишкешуналди шадарна.
Реабилитациядин центр “Наездник”, “Велотренажёр”, “Беговая дорожка”, “Тотал Джим”, “Элипсоид” ва маса тренажёрралди таъмин я.
“Гроссан тренажёр” — им цIийи технология, кIвачер, къекъвез хьун (опорно-двигательный аппарат) къайдадиз хкун патал ам виридалайни герек затI я. Гила чи центрада ийизвай яшайишдинни медицинадин къуллугърин ери кьатIуз жедайвал хкаж жеда.
Мадни гзаф шад хьана, чи пешекарар гъавурда тун ва и тренажёр кардик кутун патал фондунин чалишмишвилер себеб яз Москвадай Артур Юханович Гросс (соавтор, тренажёр арадал гъанвай Юхан Гроссан хва) атана.
Алай и четин девирда ихьтин регьимлу, мергьяматлу, масадан гьалдикай хабар кьадай, куьмекдин гъил яргъи ийизвай ксар хьун, абуру чпин жергеяр мадни къалинарун гьикьван хъсан кIвалах я.
“Леки” фондунин векилар гьакъикъатдани мергьяматлу, регьимлу, масадаз хъсанвал ийиз кIандай, чIехи рикI авай ксар я. Чна аялринни жаванрин реабилитациядин центрадин вири коллективдин, гьакIни Кьиблепатан Дагъустандин аялрин ва абурун диде-бубайрин патай мергьяматлувилин “Леки” фондуниз сагърай лугьузва!
Квехъ мадни еке агалкьунар, фикирдани авачир кукIушар муьтIуьгъдай къуватар хьурай! Куьне ийизвай хъсанвилерин нетижаяр квев агакь хъувурай ва квел уьмуьрда анжах куьн хьтин регьимлу ксар дуьшуьш хьурай. Халикьди квез вири мурадар, къастар кьилиз акъуддай къуват гурай! Амин!
Дагъви Шериф
