Мукьвара, зи кефияр лап чIур хьанваз, участокдин духтурдиз кIвализ эверна. Ада флюорография авун, жигеррин гьал акун лазим тирди лагьана. За духтурди лагьайвал авуна, снимок адаз къалурайла, “кичIе жедай затIни авач, халу” лагьана, ада зун секинарна. Амма зи гьалди масакIа лугьузвай, заз нефес чIугваз къвердавай четин жезвай. Жигеррин снимок райбольницадин терапиядин отделенидин заведующий И.Мустафаеваз къалурдайвал хьана. “ГьикI затIни авач? Жигерар кьве патайни кьунва, тади гьалда КТ авун лазим я, жигерриз гьикьван зарар ганватIа чирна, больницада къаткана кIан жеда”, — лагьана ада.
Компьютердин томографияди зи жигеррин са патаз — 40 ва муькуь патазни 10 процентдин зиян хьанвайди къалурна. Зун Мегьарамдхуьруьн райбольницадин садакай масадак акатдай азаррин отделенида къаткун лазим тирди ван хьайила, икьван гагьда больницада тахьай зун михьиз руьгьдай аватна… Амма зун иниз кьабулай, зав гьа сифте декьикьайрилай эгечIай тегьерди зи рикIик сифтедай акатай гъалаба яваш-яваш хкудна. “Ша, халу, ша, инаг ви чка я”, — лагьана, заз чарпай къалурай духтурди мадни давамарна: “Куьн фад хъсан хъжеда, кIусни кичIе жемир!”
Больницада ягъай рапарихъ, кьабулай амай серенжемрихъ галаз санал духтуррин хуш рафтарвилини, шаксуз, зи гьал фад хъсанарна. Гьар пакамахъ, гьакI юкъузни са шумудра палатадиз къвез чи гьал хабар кьазвай духтурри: “Куьн гьикI я, вири хъсан яни?” “Хъсан я!” — жаваб гудай чна, палатада авайбуру. И гафар чи арада хуш рафтарвилин, саламдин келимайриз элкъвенвай. Гила чун кIвалериз хтайлани, и гафар чи сивера амазма. Санал палатада хьайи чна сада-садаз зенгер авурла, и гафар тикрарзава.
Заз мадни а кардикай лугьуз кIанзава хьи, вири духтурар ва медсестраярни сад хьтинбур жедач, вири азарлуярни. Больницада авайла, за ихьтин кардиз фикир гана: дугъриданни, азарлуяр масадбур чпикай пара инжиклу ийидайбурни жеда кьван. Зун гъавурда гьатзава, тIал-квал хьайила, инсандин къилих дегиш хьунни мумкин я, амма жувавай жедай кардани масад инжиклу авун виже къведач. Мисал яз, бязибур пIапIрус чIугваз къецел экъечIдай, амма амай вахтара, месел яргъи хьана, медсестраяр “и затI гъваш, ам гъваш” лугьуз, датIана ката-калтугда твадай. Дагъви итимриз им гьич кутугай тегьер туш.
Эхирдайни заз Мегьарамдхуьруьн ЦРБ-дин кьилин духтур Гь.Беглерован тешкилатчивилин, регьбервилин хъсан кIвалахни къейд авунихъ галаз сад хьиз (чпин пешедал рикI алай, везифаяр гьакъисагъвилелди кьилиз акъудзавай хъсан духтурарни медсестраяр райондин больницада кIватIун — им, шаксуз, адан зегьметдин нетижани я), адаз ва зун сагъарай духтур Наира Гьажиагьмедовадиз, медсестрайриз — Пери Абдулкеримовадиз, Анфета Агъаевадиз, Индира Багъировадиз, санитаркайриз — Пери Мирзебутаевадиз, Перизат Мирземетовадиз, Пери Назировадиз рикIин сидкьидай сагърай лугьуз кIанзава. Квез Аллагьди сагъвал, рикIериз шадвал гурай, куь хизанра садвал, кIвалера берекат бул хьурай! Куьне вирида чал чIугур зегьмет Аллагьди квадар тавурай, гьуьрметлубур!
Башир Шихмурадов,
Тагьирхуьруьн-Къазмаяр
