Чи ватанэгьлияр — гьар сана
И мукьвара “ЦIийи дуьнья” газетдин редакциядиз Краснодарский крайдин Усть-Лабинский районда яшамиш жезвай чи баркаллу ватанэгьли, фийиви Велединан хва Муртузов Нажмудинан тIварцIелай (ам Кубанда лезгийрин культурадин обществодин председатель я) атай чарчи чун шадарна. Ингье ана вуч кхьенватIа:
“Салам алейкум, гьуьрметлу районэгьлияр! Патал яшамиш жезватIани, хайи гъвечIи ватан чна са юкъузни рикIелай ракъурзавач. Интернетдай “ЦIийи дуьнья” газетдин куьмекдалди райондин вири къайгъуйрикайни цIийивилерикай чун хабардар я, агалкьунрал шадвалзава. Чунни ина кьулухъ акъвазнавач, лезгияр сад ийиз, дидед чIал, культура, адетар хуьз, мергьяматлу краралди сада-садан гъил кьаз алахъзава, культурадин ва спортдин мярекатар тешкилзава. ИкI, апрелдиз чи рагьметлу стха, Краснодарда, лезгийрин куьтурадин центрадин тешкилатчи ва адан 1- председатель Абдулаев Мирзабала рикIел хкун яз, адан тIварцIихъ Усть-Лабинск шегьерда “Самур-Кубань” ва “Фий-Усть-Лабинск” командайрин арада футболдай гъвечIи турнир кьиле тухвана. Хъсан адетдиз элкъвенвай (гила ругуд лагьай сеферда кьиле тухузва) и турнирдин мурад-метлеб ватандивай яргъа яшамиш жезвай лезгияр сад авун, халкьарин арада дуствилин алакъаяр хуьн я. “Самур-Кубань” командадин патай виликдай Россиядин хкягъай командадик квай машгьур футболист Максим Деменко къугъвана. Командадин варарни Ягнис Туршиева (виликдай ам варар хуьдайди тир) хуьзвай. “Фий-Усть-Лабинск” командадик кваз РФ-дин адвокатрин палатадин Краснодарский крайда вице-президент Денис Бочкарёв къугъвазвай. Турнирдин судья — Артур Агъарагьимов, духтурни жегьил чи ватандаш, бажарагълу духтур Даир Мегьамедагъаев тир. Абуруз ва Усть-Лабинск шегьердин администрациядиз, спорткомитетдиз, “Кубань” стадиондин дирекциядиз, гьакI кьиле чи стхаяр Наврузалини Букар аваз Усть-Лабинскдин вири активдиз чухсагъул!”.
Ихьтин чар кIелайла, мецел анжах разивилин “баркалла, аферин, сагърай, лезги стхаяр!” келимаяр къвезва.
Малум хьайивал, Усть-Лабинскда анжах са Ахцегь райондай тир 100-лай гзаф хизанар ава. Агъулар ва лезги дестедин маса халкьарин векиларни кваз — 300 хизан. Гьар йисан гатфарихъ Нажмудин Муртузован регьбервилик кваз абуру Яран сувар ва халкь садзавай, бубайрин хъсан адетар хуьзвай метлеблу маса серенжемар кьиле тухузва. Месела, шаз, коронавирусдин тIугъвалдихъ галаз алакъалу яз, Ахцегьа “Шарвили” эпосдин 21-сувар тухуз тежерла, Кубанда Муртузов Нажмудин кьилевай лезгийрин культурадин центради ам чпелай алакьдайвал 5-июлдиз Краснодарский крайда кьиле тухванай. Адаз талукь яз Динский райондин Нововеличковский станцияда футболдай “Самур” ва “Кубань” командайрин арада дуствилин къугъунарни тешкилнай. Суварин шадвилин серенжемарни къунагълухар Шагьабудин Зурумован “Фермадин патав” ял ядай базада давамарнай. Дугъриданни, ихьтин кIвалах тухун халис ватанпересвилин лишан я. Зурба общественник тир Нажмудина ана, вичи кьил кутуналди, гьакI симинин пагьливанрин ансамблни тешкилна, адаз регьбервал гузва.
Чна районэгьлийрин, вири лезги халкьдин патай Кубанда кардик квай лезгийрин культурадин центрадиз — вири лезги стхайриз сагърай лугьузва!
Дашдемир Шерифалиев
