Дагъустандин искусствойрин лайихлу деятель, композитор, манидар Къагьриман Ибрагьимова республикадин музыкадин искусствода зегьмет чIугваз, яратмишиз яхцIур йисалай гзаф я. Вичин кьетIен бажарагъдалди ада милли музыкадиз ажайиб сесер, везинар, авазар гъизва. 600-лай виниз манияр теснифнава.
16-майдиз Дербент шегьерда СтIал Сулейманан тIварунихъ галай Лезгийрин госмуздрамтеатрдин чIехи залда Къагьриман Ибрагьимова бажарагълу шаир Билал Адилован чIалариз теснифнавай цIийи манийрин “Гатфарин гьиссер” концерт кьиле фена. Концертдин программа теклифай вири гьевескарри тамашачийриз неинки гатфарин, гьакI чпин рикIерин гьевесни, чимни, илгьамни багъишна. Концертдиз Бакудайни Билал Адилов ва манидарар атун лазим тир, амма сергьят агалнавайвиляй абур акьунач.
Къейд ийиз кIанзава хьи, Къагьриман Ибрагьимованни Билал Адилован (са композитордин ва са шаирдин) концертдин программаяр санал гьазурунин, цIийи манияр яратмишунин тежриба икьван гагьда лезги музыкадин алемда хьайи кар тушир. Милли эдебият ва музыка вилик тухунин, абур мадни виниз тир дережайрив агакьарунин къастар вилик эцигнавай ксари чпин сифте бегьер 2018-йисуз майдандиз акъуднай. Сифтегьан концертни Бакуда ва ахпа Дербентда тамашачийриз къалурнай. Инсанри цIийи манияр хушвилелди кьабулнай. Ихьтин агалкьуни кьве автордиз мадни санал яратмишдай гьевес ва къуватар гана. Майдандиз “Гатфарин гьиссер” концертни акъатна. Ам авторри Дагъустандин Автономиядин 100 йис тамам хьуниз бахшнавай. Концерт РД-дин культурадин ва милли сиясатдинни диндин крарин рекьяй министерствойрин, республикадин “Лезги газетдин” къаюмвилик кваз тешкилнавай.
Югъ пара гуьзелди тир. Театрдин дараматдин вилик пад ял язавай инсанрив, иллаки аялрив ацIанвай. Театрдин хъсандиз ремонтнавай залда тамашачийри чкаяр кьунва. Концерт кьиле тухузвай Владик Батманова сад лагьай мани малумарзава. Республикадин виш йисан юбилейдиз бахшнавай “Дагъустан” мани Ислам Велиханова лагьана. Сегьнеда эцигнавай еке экрандал Дагъустандин тIебиатдин, хуьрерин, шегьеррин, инсанрин шикилар акъатна. Экрандикай вири вахтунда менфят къачуна. Адал лугьузвай манидин темадиз килигай шикилар акъатзавай.
Концерт пуд сятда давам хьана. Ам куьтягь хьанвайдакай лагьайлани, тамашачийриз хъфиз кIанзавачир. Идалдини чи инсанар халисан лезги, рикIик кужумдай, руьгьдик цицIивал кутадай манийрихъ цIигел тирди аквазвай.
Куьрелди лагьайтIа, концертдин цIийи программа ватанпересвилин, кIанивилин ва чи гуьзел тIебиатдин манийрикай ибарат тир. “Дарих я ватандихъ”, “Гьажи Давуд”, “Дидедин чIал”, “Чун, куьн сагърай!”, “Каспий гьуьл”, “СтIур”, “Кьулан вацI”, “Хайи чил”, “Дуствал” манийри яб акалзавайбурун рикIерик гьевес кутазвай, руьгьдин деринра ватандал дамах авунин гьиссер арадал гъизвай. Бязи легьзейра бедендиз харни акъудзавай.
Гьелбетда, манидин, яни музыкадинни чIаларин мана, везин яб акалзавайдав агакьарун манидардилайни аслу я эхир. Таб тавуна лугьун герек я, тамашачийрин вилик экъечIай гьар са манидардихъ кьетIен, вичиз хас сес, алакьун, сегьнеда вич тухунин бажарагъ авай. Дагъустандин халкьдин артистка Фаризат Зейналовади, Таира Муспагьовади, Седакъет Саидовади, Заира Чигниевади, Мая Алимутаевади, Ислам Велиханова, Руслан Ибрагьимова, Къабил Аллагькъулиева, Фаргьад Абдурагьманова тамашачийриз шадвал багъишна, абурун гьиссерал чан гъана ва гьа идалди гурлу капар, цуьквер къазанмишна.
Концертда тамашачийриз са акьван малум тушир манидаррини иштиракзвай. Абурун жергедай тир Замина Шихалиевади, Эмирсултан Бегеева, Славудин Насруллаева, Ханум Фейзуллаевади, Малик Фейзуллаева, сегьнедиз атана, гьа сифте сесер акъуднамазди, яб акалзавайбур чпин алакьунрин таъсирдик кутуна. Мад сеферда успат хьана, чи арайра “чахъ я бегьем манидарни, я тарифлу манини авач” лугьузвайбурун гафар бушбур я, бажарагълу пара жегьилар ава. Абуруз аферин къвезва.
Концертдин агалкьунин мад са тереф адакай ибарат тир хьи, манияр, яни музыка са шумуд жуьредиз пай жезвай. Туьнт, зиринг, кьуьлердай, секин, бедендик кужумдай, кIанивилин ашкъи артухардай, сегьнедиз экъечIна, вальсдин чархар ядай… “Дарих я ватандихъ”, “Дагъларин тават”, “Зи рикIел хтана”, “Мумкин яни?”, “АкI кIанда заз”, “КIанда заз алкIиз”, “Къакъат жезвач завай”, “Байихда вуна” манийрихъ тамашачийри хушвилелди яб акална.
Концертдал дуэтрини чан гъана. З.Шихалиевадини Э.Бегеева ва Х.Фейзуллаевадини М. Фейзуллаева лагьай “Руьгьдин гьарай”, “Амач ина ви атир” манийри залдик юзун кутуна.
Гьелбетда, Къагьриман Ибрагьимова устадвилелди тамамарай “Лекь” ва “Чан зи Ватан” манийри гурлу капар арадал гъана.
РД-дин милли сиясатдинни динрин крарин рекьяй министерстводин къуллугъчи Арсен Магьмудова ва культурадин министерстводин патай Лезги театрдин директор Динара Эминовади милли музыка вилик тухунин кардик чпин пай кутазвай композитордиз ва манидарриз гьуьрметдин грамотаяр гана.
Абад Азадов
