17-майдиз Мегьарамдхуьруьн райондин администрацияда кьиле фейи совещанидал муниципалитетдин яшайишдин вири хилериз талукь месэлаяр веревирдна. Райондин кьил Фарид Агьмедова вичи гайи тапшуругъар тамамарнавай тегьер ахтармишна.
ИкI, райондин руководителди идалай вилик КьепIир-Къазмайрал мектеб ва аялрин бахча эцигдай чкаяр ахтармишиз фейидалай кьулухъ проектар туькIуьруниз талукь тапшуругъар гьазурун тапшурмишнай. Райондин мулкунал алай яшайиш патал важиблу са жерге объектриз талукь яз Ф.Агьмедова вилик эцигнавай месэлайрикай лагьана. Кьилди къачуртIа, ада Билбилхуьр-Къазмайрал эцигнавай цIийи мектебдин дараматдиз талукь документар, школа ачухунин месэла гьялун патал талукь тир идарайрив агакьарнавайдакай лагьана. Гьа са вахтунда ада къейд авурвал, район виликди тухунин стратегияда ва агьалийрин яшайишдин шартIар хъсанарунин планда цIийи мектебар, аялрин бахчаяр эцигун, ачухун кар алай рекьерикай сад я. Инал ихтилат ЦIийихуьруьн аялрин бахчада кьвед лагьай десте кардик кутуникай, гьакIни Мегьарамдхуьре эцигнавай аялрин цIийи бахча тамамдаказ ишлемишиз вахкуникай (къейд ийин, алай вахтунда объектдиз талукь месэла Сад тир заказчидин-застройщикдин дирекцияди гьялзава) физва.
Райондин образованидин идарайри республикадин “100 мектеб” проектда гьар йисуз иштиракзава — алай 2021-йисуз капитальнидаказ ремонт авуниз ва материально-технический гьал хъсанаруниз талукь программада райондин ругуд школади иштиракда. РикIел хкин, проектдин бинеда республикадин ва муниципальный бюджетрай финансар чара авун ва инвесторри иштиракун ава.
“Шегьердин къулай шартIар” ва “Культура” милли проектриз талукь яз райондин кьили Советский хуьруьн 400 кас гьакьдай клубдин тамашачийрин зал бинедилай ремонт авунин ва паркар туькIуьрзавай вад чкада эцигунрин кIвалахар кьиле физвай гьал ахтармишунин тапшуругъар гана.
Совещанидал къарагъарай нубатдин важиблу месэла агьалияр хъвадай целди таъминарунинди тир. Районда целди таъминардай “Ярагъ-Къазмаяр — Бут-Къазмаяр — ЦIийи хуьр — Къиличхан — Кьуьчхуьр” водовод туькIуьрунин кIвалахар давам жезва. ГьакIни республикадин идарайрин дережада аваз Муьгъвергандал ва КьепIир-Къазмайрал хъвадай цин буругъар ягъунин месэла гьялзава.
Гуьгъуьнлай райондин кьил налогар кIватIунин, ЕГЭ-диз ва ОГЭ-диз гьазурвал акунин, мектебра “эхиримжи зенг” мярекат тухунин, вакцинациядин, гьакIни зулухъай жедай сечкийрин месэлайрал акъвазна. ИкI, тIугъвалдикай хуьниз талукь истемишунар кьилиз акъудун яз, райондин мулкунал “эхиримжи зенгинин” мярекатар 22-майдиз, гзаф кьадар агьалийрин иштираквал авачиз тешкилунин къарар кьабулнава.
Иммунизациядикай рахайтIа, 17-майдалди райондин 1403 агьалидиз вакцинадин рапар янава. Рапар ягъиз кIанзавайбурун кьадар, ада къейд авурвал, къвердавай гзаф жезва.
«Лезги газет»
