2023-йисан 1-далай 8-январдалди, Вирироссияда хьиз, Кьурагь райондани гьар йисуз кьиле тухун адетдиз элкъвенвай спортдин ва сагъламвилин декада тешкилна. Им неинки гзаф инсанри иштиракдай спортдинни сагъаламвал мягькемардай серенжемар тешкилунихъ, гьакI вири хизанди санлай ял ягъунихъ элкъуьрнавай цIийи жуьрени я…
Райадминистрациядин пресс-къуллугъди хабар гузвайвал, Кьурагь районда спортдин ва сагъламвилин декададин сергьятра аваз гьар йисуз жуьреба-жуьре мярекатар тешкилзава. ЦIи лагьайтIа, баскетболдай итимрин арада акъажунар кьиле тухун кьетIнавай. Ана 6 командадик кваз 60-далай виниз ксари иштиракна.
Тамам 4 юкъуз давам хьайи къизгъин къугъунрин нетижада “ДЮСШ” — 1, “Гияр” — 2 ва “Кьурагь” команда 3-чкадиз лайихлу хьана.
Кьурагь райондин физкультурадин ва жегьилрин крарин рекьяй отделдин начальник Рамиз Рамазанова акъажунра иштиракай ва гъалибвал къазанмишай ксар тебрикна, алукьнавай йисуз спортдин рекье еке агалкьунар хьана кIанивилин келимаяр лагьана. КIвенкIвечи чкаяр кьур вири командайриз медалар, грамотаяр ва пишкешар, 1-чка кьур командадизни, адет тирвал, кубок гана. Виридалайни хъсандиз къугъунай Замир Абдуллаев, Эдгар Халикьов, Гуьлмегьамед Азизов, Эдгар Алибегов акъажунрин тешкилатчийрин патай кьилдин пишкешриз лайихлу хьана.
«Лезги газет»
