ЦIийи йисан вилик квай юкъуз СтIал Сулейманан райондин спортдин, туризмдин ва жегьилрин крарин рекьяй комитетди 2022-йисан нетижаяр кьуниз талукьарнавай мярекат шад гьалара кьиле тухвана. Идакай чаз райадминистрациядин пресс-къуллугъди хабар гана. Райондин образованидин управленидин ва культурадин отделдин куьмекни галаз тешкилнавай и мярекат райадминистрациядин кьилин заместитель Заур Къагьриманова алукьзавай ЦIийи йис тебрик авунин келимайралди ачухна.
Ада къейд авурвал, райондин администрация, спорт вилик тухунихъ ва сагълам уьмуьр кечирмишунихъ элкъуьрнавай вири крара куьмек гуз гьазур я. “Бедендиз, руьгьдизни ахлакьдиз сагълам инсан тербияламишун гьа виликдайни, исятдани чун патал важиблу месэлаяр я”, — лагьана ада.
Спортсменрин ва абурун тренеррин тIварарихъ чими келимаяр райондин спортдин, туризмдин ва жегьилрин крарин рекьяй комитетдин директор Чингиз Абдулмежидова, образованидин управленидин начальник Гьуьсейн Шихбабаева, азаддаказ кьуршахар кьунай ДЮСШ-дин директор Абдулнасир Мирзекеримова ва масабуруни лагьана. Азаддаказ кьуршахар кьунай дуьньядин чемпион Шамил Мамедован лентиниз къачунвай тебрикдини спортдин рекье агалкьунар хьун алхишзавай келимайри жегьил спортсменрин руьгь хкажайдал шак алач.
Адет тирвал, гуьгъуьнлай мярекат шад гьалара давам хъхьана. Амни Агъа СтIалрин СОШ-дин яратмишунардай коллективди спортдин кьуьл тамамаруналди башламишна. ЦТКНР-дин артистри — Омар Меликова ва Зугьраб Мегьамедова райондин тIвар гьуьндуьр дережадиз хкажзавай ксар чпин патай тебрикна ва манияр лагьана.
Мярекатдин сергьятра аваз спортда, кIелунинни тербиядин, насигьатчивилин ва гуьгьуьллудаказ кIвалахунин хилера тафаватлу хьайи ксарив шабагьар вахкана. ИкI, райондин спортдин, туризмдин ва жегьилрин крарин рекьяй комитетдин тIварунихъай 30 тренердиз-муаллимдиз, ДЮСШ-рин 4 директордиз, тербиядин кIвалах тухунин рекьяй абурун заместителриз, умуми образованидин школайрин старший вожатыйриз, 15 волонтёрдиз ва ДЮСШ-ра вердишвилер къачузвай 75 спортсмендиз чухсагъулдин грамотаяр ва пулдин пишкешар гана. Абурун арада яргъал йисара райондин спорткомитетдин кьиле акъвазай, алай вахтунда Агъа СтIалрин хуьруьн советдин везифаяр тамамарзавай Надир Эфендиевни авай.
Рагнеда Рамалданова
