А.З. Закиров

12-декабрдиз 77 йисан яшда­ аваз Хасавюрт райондин Къурушрин хуьруьн А. Айдунован тIварцIихъ галай 1-нумрадин юкьван мектебда саки 50 йисуз лезги ва урус чIаларин тарсар гайи муаллим, РФ-дин умуми образованидин гьуьрметлу къуллугъчи Закиров Агъали Закирович яргъал чIугур  начагъвилик рагьметдиз фена.

А. Закиров 1947-йисан 8-июндиз Ахцегь райондин Игъиррин хуьре тIвар-ван авай хипехъан Закир бубадинни Рекъия бадедин хизанда сад лагьай аял яз дуьньядал атана. ЦIийи Къурушдал  мектеб акьалтIарай Агъали 1965-йисуз ДГУ-дин  урус ва Дагъустандин чIаларин факультетдик экечIна. 1970-йисалай ам Къурушрин мектебда муаллимвилин пешедив эгечIна.

Ам вичин пешедиз вафалу, кьилин дережадин чирвилерни категория, алакьунар, бажарагъ авай муаллим тир.

Агъали муаллим чIал хуьн ва гегьеншарун патал еке зегьмет чIугур кас тир. Ада республикада лезги чIалаз талукьарнавай «элкъвей столра», конференцийра иштиракнай, чIалан месэлайрикай газетрин чинра вичин фикирарни теклифар къалурзавай макъалаяр акъуднай.

Хуьруьн жемятдиз, муаллимрин коллективдиз, аялрин диде-бубайриз Агъали Закирович гьуьрмет авай общественникни яз чидай. Адал са шумуд йисуз мектебдин профсоюздин тешкилатдин, урус чIалан ва литературадин муаллимрин метод­объединенидин регьбервилин везифаярни ихтибарна.

Гьакъисагъ зегьмет чIугур му­аллимдин кIвалахдиз лайихлу къиметни гана. Ам 2008-йисуз  райондин  «Йисан  муал­лим» тIварцIиз лайихлу хьанай. Гьа и йисуз Президентдин грантдин, «РФ-дин умуми образованидин гьуьрметлу­ къуллугъчи» лагьай лайихлу тIвар­цIин сагьибни хьана.

Къурушрин хуьруьн админис­трациядин, 1 ва 2-нумрайрин мектебрин коллективри, проф­комдин комитетри, хуьруьн жемятди Закиров Агъали Закирович рагьметдиз финихъ галаз ала­къа­лу яз, адан хизанриз, мукьва-кьилийриз, ярар-дустариз, де­рин­­дай хажалат чIугунивди, башсагълугъвал гузва. Адан экуь къамат юлдашрин рикIерай акъатдач.