11-апрелдиз Махачкъала ва Каспийск шегьеррин арада эцигзавай Иса пайгъамбардин (алейгьи салам) тIварунихъ галай руьгьдинни марифатдин макандин (Духовно-просветительский центр) чIехи дараматда лезги халкьдин чIехи межлис кьиле фена. Дагъустандин Муфтиятди тешкилнавай и мярекатда 7 агъзурдав агакьна инсанри иштиракна.
Межлисдавай мугьманрин арада РД-дин Гьукуматдин Председателдин заместитель — чилерин ва эменнидин алакъайрин министр Заур Эминов, РД-дин милли сиясатдин ва динрин крарин рекьяй министр Энрик Муслимов, Докъузпара райондин кьил Мегьамед Шамилов, РД-дин Халкьдин Собранидин депутатар — Ильман Алипулатов, Марат Алияров, Мегьамед Алиханов, Каспийск шегьердин администрациядин депутатрин Собранидин председатель Абдулвагьид Жаватов, РД-дин муфтийдин заместитель Шамил Алиханов, шегьерринни районрин имамар, жемиятдин, илимдин, диндин векилар, жергедин агьалияр авай.
— За гьар йисуз и маканда сив хуьнин вацра кьиле физвай лезги халкьдин ифтарда (мусурманри сив хкудун — авт.) иштиракзава, — къейдна Заур Эминова, мярекат тешкилуник пай кутунвайбуруз сагърай лугьуналди. Ада гьакIни ихьтин межлисрихъ Дагъустандин халкьарин арада дуствални стхавал мягькем хьунин жигьетдай еке метлеб авайдини алава хъувуна.
Гуьгъуьнлай рахай Энрик Муслимовани рамазандин вацра республикада яшамиш жезвай халкьар садзавайди къейдна.
Хейлин йисара Кьурагьа имамвал авур, алай вахтунда Кьасумхуьруьн имамдин везифаяр тамамарзавай, вичин ери-бине Тлярата райондай тир Шамил Омарова вичин рахунра вири Кавказдив, Урусатдив мусурманрин дин лезги халкьдилай агакьайди къейдна ва мярекатдин иштиракчийриз чIехи алимри кутур рекьериз мукьва хъхьуниз, Аллагьдиз ибадат авуниз эвер гана.
Мярекатдин сергьятра аваз иштиракчийрин арада жуьреба-жуьре савкьатар, умрадиз фидай путёвка къугъвана. Заур Салигьова тамамарай нашидри межлис мадни гурлу авуна. Эхирдай вирида санал сив хкудна.
Агьмед Магьмудов
