И мукьвара ахцегьви машгьур шикилчи, гьевескар эколог ва «ЦIийи дуьнья» газетдин штатдик квачир мухбир Юсиф Саркаров РФ-дин фотохудожникрин Союздин членвиле кьабулнава.

Ю. Саркарован яратмишунар уьлкведин дережада машгьур хьун, абуруз пешекарри хъсан къимет гун ва махсус конкурсдин нетижада ам,  дагъустанвийрикай сад лагьайди яз, Россиядин пешекар фотохудожникрин тешкилатдиз кьабулун неинки са чи ватанэгьлидин, адан хайи райондин, гьакIни вири республикадин агалкьун яз гьисабиз жеда.

Россиядин фотоху­дожникрин Союздин теш­киллувилин 1-съезд 1990-йисуз Курск шегьерда кьиле тухванай. Анал РФ-дин пешекар фотохудожникри, жеми­ятдин тешкилат яз, чпин Союз арадал гъана. Алай вахтунда ам кьве агъзур касдилай гзаф членрикай ибарат я. Союздин отделенияр ва филиалар уьл­кведин 47 субъектда ава.

Россиядин фотохудожникрин Союздин асул месэлаяр ва макьсадар чи уьлкведин шикилрин искусство вилик тухуниз куьмекун, гьам Россияда, гьамни адалай къеце фотоискусство машгьур авун, шикилрин ирс хуьн ва ам яратмишдай къайдада ишлемишун я.

Шикилрин искусство вилик тухунин мураддалди РФ-дин фотохудожникрин Союзди мукьвал-мукьвал выставкаяр, конкурсар, фестивалар, яратмишунин семинарар ва искусстводин маса мярекатар кьиле ту­хузва.

Дашдемир  Шерифалиев