Мукьвара Москвада лезгийрин милли культурадин федеральный автономиядин (ФЛНКА) Советдин нубатдин заседание кьиле фена.
Мярекатдин сергьятра аваз веревирд авур месэлайрикай сад лезги публицистикадин хиле арадал гъанвай, Рамил Микаилован тIварунихъ галай премиядин сад лагьай сагьиб тайинаруниз талукьди тир.
ФЛНКА-дин президент Ариф Керимова рикIел хкайвал, Советдин 2019-йисан 6-ноябрдиз кьиле фейи заседанидал интернетда кардик квай “ЛезгиЯР” портал арадал гъайи машгьур журналист Рамил Микаилован экуь къамат эбеди авун патал адан тIварунихъ галай премия тешкилдай къарар кьабулнай. Икьрар хьайивал, премия гьар йисуз гудайвал я.
“Рамил и дуьньядай фад хъфин чун патал еке магьрумвилиз элкъвена. Ам вичин вири уьмуьр хайи халкьдиз бахшнавай чIехи ватанперес тир. Арадал гъайи порталдин куьмекдалди ада жемиятдин фикир лезгийрин тарихдин, медениятдин, чIалан ва маса месэлайрал желбзавай. Милли публицистика, журналистика алай вахтунда куьмекдихъ муьгьтеж я. Чаз Рамил Микаилов хьтин къастунал кIеви пешекарар герекзава. Гьа ихьтин алакьунар авай журналистрикай сад “Лезги газетдин” кьилин редактор Мегьамед Ибрагьимов я”, — лагьана А.Керимова.
ФЛНКА-дин исполкомдин председатель Гьуьсен Шагьпазова, премия гунин гьакъиндай Мегьамед Ибрагьимован кандидатурадин тереф хуьналди, алай йисуз “Лезги газетдин” 100 йис тамам хьанвайди рикIел хкана. Ада къейд авурвал, Мегьамед Ибрагьимован регьбервилик кваз газетдин ери хъсан жезва, Дагъустан ва лезги халкь патал важиблу месэлаяр къарагъарзава. Интернетдани “Лезги газетдин” сайт вилик жергейра авайбурукай сад я, яшайишдин сетрани кIвалах къайдадик кутунва.
Заседанидин сергьятра аваз Советдин членри Рамил Микаилован тIварунихъ галай сад лагьай премия Мегьамед Ибрагьимоваз гудай къарар кьабулна.
Премия (100 агъзур манат) ва лауреатдин диплом адав мукьвара вахкудайвал я.
“Лезги газетдин” редакциядин коллективди Мегьамед Ибрагьимоваз и агалкьун мубаракзава, адахъ кIвалахда, яратмишунрин рекье мадни еке дережаяр хьун алхишзава.
Чи мухбир
