Маскайри инсанар хуьда
Сагъламвилин гьалариз къимет гунин рекьяй Америкада авай институтдин (IHME) алимри тайинарнавайвал, эхиримжи са шумуд вацра инсанри медицинадин маскаяр ишлемишуникди 130 агъзурдав агакьна агьалияр анжах США-да къутармиш жеда. Алимрин фикирдалди, коронавирусдиз аксивалунин жигьетдай кьабулнавай и серенжем виридалайни метлеблуди я. Пешекаррин фикирар “Nature Medicine” чешмеда чапнава.
Женгер, тахсирар, къурбандар…
Азербайжандин президент Илгьам Алиева, вичин республикадин тереф хуьнин мураддалди Дагълух Къарабахда женгер тухун патал къецепатай гьакъидихъ женгчияр кьунва лугьуз, Минскдин ОБСЕ кIватIалдик квай уьлквейри (Россия, США ва Франция) кутазвай тахсирар бине авачирбур яз гьисабзава. Идакай ада Италиядин “RAI-1” телеканалдиз гайи интервьюда малумарна. А видео YouTube-дани раижнава.
“Чна Россияди Эрменистандиз ракъурзавай яракьрикай гьар юкъуз ихтилатзавач кьван…”, — лагьана Алиева.
Алиева наразивилелди къейдзавайвал, бейтерефвал хуьн герек тир уьлквейри сиясатдин, военный рекьерай Эрменистандиз куьмекар гузва. Ада туьркерин кьушунри женгера иштиракзава лагьай делилни тапанди я лугьузва. Амма и делил якъинди тирди субутнавай уьлквеярни ава. Туьркияди куьмек гузвай Сириядин боевикар женгера иштиракун патал Дагълух Къарабахдиз ракъурнавайдакай октябрдин сифте кьилера малум хьанай. Эрменистанди Азербайжандин пад хуьн патал 4 агъзур боевикди женгер тухузвайдакай малумарнай. Амма женгер лап къизгъинбур, инсафсузбур тирвиляй, “The WaII Street JournaI” чешмедин делилралди, вишералди боевикри элкъвена кьулухъ хъфиз кIанзавайдакай малумарнай.
Женгерив эгечIайдалай инихъ а республикайрин хейлин агьалияр къурбандриз элкъвена. Ягъунар акъвазарун патал кьве уьлкведин гьукумдарар гьеле садавайни чIалал гъиз хьанвач.
Къарабахда алай йисан 27-сентябрдилай женгер давам жезва. 18-октябрдиз женгер акъвазарунин икьрардал къведай меслятар Россиядин иштираквал аваз авунатIани, са тIимил чIавалай са терефди муькуьдак женгер давамарна лугьуз тахсирар кутуна.
Батарейка туькьуьнна
Австралияда батарейка туьтуьнилай фейидалай кьулухъ 3 йисан яшда авай гъвечIи руш кьена. Ахтармишай духтурри сифтедай аял зегьерламиш хьанва лагьана. Идакай “ABC News” чешмеди хабар гузва.
Сифтедай аялди туьд тIазвайдакай хабар гана. Гуьгъуьнлай садлагьана нерай иви фена. Азарханада духтурри адак вирус ква лагьана, са шумуд йикъалай хъсан хъжедайди тестикьарна. Амма рентген авунач. Кьвед лагьай сеферда духтурриз эвер хъувурла, абуруз аялди гъвечIи сятинин батарейка туькьуьннавайди чир хьана. Хуьрекдин рад кана, батарейка шагьдамардиз фена. Кьве операция авунатIани, духтурривай аял къутармишиз хьанач.
Кьисас вахчун давамарда
Иранди махсус “Аль-Кудс” подразделенидин командующий, генерал К.Сулеймани кьинай кьисас вахчун США-дин военный базадал ракетайрин куьмекдалди гьужумуналди акьалтIнавачирдакай хабар ганва. Ихьтин фикир “Звезда” телеканалдиз гайи интервьюда РФ-да авай Ирандин векил К.Жалалиди раижна.
“Чна гьеле тамамвилелди кьисас вахчунвач. Чи дустарикай сада лагьайвал, чна США-дин военный базадиз цIай гана, амма им Сулеймани аваз хъиткьинай машиндай кьисас я. Сулеймани вич кьинай кьисас гьеле вахчунвач”, — раижзава дипломатдин гафар журналистри.
Хъиткьинна
Пакистандин Пешавар шегьерда медресада бомба хъиткьинуникди ирид кас кьена, 80-далайни гзаф ксарал хирер хьана. идакай “Reuters” чешмеди хабар гузва. Бомба медресада образованидиз талукь важиблу лекция кIелзавай вахтунда хъиткьинна. Муаллим азарханадиз аватна. Хирер хьанвайбурукай вад кас лап пис гьалда ава.
Къейдзавайвал, туькIуьрнавай хъиткьиндай затI, полиэтилендин пакетда туна, малум тушир ксари медресада кардик кутуна. Тахсиркарар гьеле дуьздал акъуднавач.
Бинесуз аксивилер
США-ди Россиядизни Ирандиз акси яз акьван санкцияр кардик кутунва хьи, абуруз мад цIийи санкцияр малумардай мумкинвал саки амач. “ТАСС” чешмедин делилралди, ихьтин фикир милли хатасузвилин рекьяй США-дин президентдин меслятчи Р.О’Брайена малумарна. ЯтIани, Америкадин гьукумдарри Россиядиз, Ирандиз, Китайдиз ва бязи маса уьлквейриз талукь яз мумкин тир вири серенжемар веревирдзава.
Эхиримжи йисара Вашингтонди Россиядиз талукь яз са жерге санкцияр малумарна. Себебарни Крым Россиядик ахкахьунихъ, ана муьгъ туькIуьрунихъ галаз алакъалу авунва. Идалайни гъейри, 2016-йисуз кьиле фейи Украинадин президентдин сечкийрик гуя Россия къаришмиш хьана лугьуналди, Америкади адак са шумудра бинесуз тахсирар кутунай.
«Лезги газет»
