Мукьвара Дагъустанда республикадин мулкунал виридалайни чIехиди тир емишрин гьамбарханадин сад лагьай пай ишлемишиз вахкуда. Идакай РД-дин премьер-министр Абдулмуслим Абдулмуслимова хабар гана. Ада къейд авурвал, Дагъустан Россияда хуьруьн майишат вилик тухунин рекье кIвенкIвечийрикай сад я ва ада виридалайни виниз тир агалкьунар авай 10 региондин арада чка кьунва. Гьар йисуз республикада 1,5 миллион тонндилай виниз майваяр, 45 агъзур тонн лапагдин як ва 160 агъзур тонн дуьгуь гьасилзава.
Амма идалай вилик гзаф йисара регионда гьасилнавай недай суьрсет хуьдай мумкинвал тахьунихъ галаз алакъалу четинвал авай. Емишар хуьдай гьамбархана ачухуни и месэла гьялиз куьмек гуда — ада хуьруьн майишатдин суьрсет гзаф кьадарра хуьдай ва ам йисан вахтунда маса гун таъминардай мумкинвал гуда.
«Алай вахтунда республикада 30 агъзур тонн суьрсет хуьз жедай гьамбарханаяр ава. СтIал Сулейманан райондани 50 агъзур тонн емишар хуьз жедай гьамбархана эцигзава. Мукьвара 12 агъзур тонн суьрсет кьабулиз жедай сад лагьай пай ишлемишиз вахкуда. Мад са объект (11 агъзур тонн емишар ва я майваяр гьакьдай) лап виниз тир бегьерлувилин багълар кутунал машгъул маса карханади эцигзава», — лагьана А.Абдулмуслимова.
Къейд ийин, СтIал Сулейманан районда 50 агъзур тонн ичер, винел патан акунар чIур тахьана, 8-10 вацра хуьдай мумкинвал жедай гьамбархана эцигиз гъиле кьунвайдакай чна идалай виликни хабар ганай. Проект тамамдиз 2030-йисалди кьилиз акъудун лазим я. Инвестпроектдин сад лагьай пай уьмуьрдиз кечирмишун патал ВТБ банкди «Полоса» компаниядиз («Рычал-Су» ГК-дик акатзава) кьезил шартIаралди 1,1 миллиард манатдин кредит ганва. И такьатрихъ 2024-йисуз гьамбарханадин сад лагьай пай (11 агъзур тонн ичер кьабулиз жеда) эцигунин кIвалахар акьалтIарун лазим я. Идалай кьулухъ компанияди гьамбархана тамам къуватдив агакьарун лазим я.
«Инвестпроект 2030-йисалди фикирда кьунва. Емишар хуьдай гьамбарханадин майдан 50 агъзур кв. метрдив агакьда. Санлай къачурла, гьамбарханадин проект кьилиз акъудуниз 5,2 миллиард манат инвестицийрин такьатар серфда», — хабар гузва идарадин пресс-къуллугъди.
Хабар гузвайвал, гележегдин емишрин гьамбарханадин патав гвай мулкара инвесторди 1000 гектардилай гзаф майданда виниз тир бегьерлувилин ичин багълар, 2000 гектардилай гзаф шуьмягърин тарар, 30 гектарда кIерецрин багъ, 20 гектарда пIинийрин виниз тир бегьерлувилин къелемар, 10 гектарда бадамдин тарар (миндаль), 5 гектарда анарар, 5 гектарда хурма ва 5 гектарда киви цанва.
Жасмина Саидова
