Гатун са йикъа хъуьтIуьн са варз тухарда, лугьузва бубайрин мисалда. Гьакъикъатдани, гад чуьлдин кIвалахрин къизгъин вахт я. Хуьруьн майишатдин карханайрин, лежбервилинни фермервилин майишатрин, хуьрерин зегьметчийрин вилик акъвазнавай кьилин везифайрикай сад ва хсуси маларизни лапагриз алафдин мягькем бине яратмишуникай ибарат я.
— Гатун и йикъара CтIал Сулейманан районда карханайри ва хуьрерин зегьметчийри вири къуватар алафар гьазурунал желбнава, — лугьузва райондин хуьруьн майишатдин ва суьрсетдин управленидин кьилин пешекар Гьамидин Абдулкъафарова. — Пландин бинедаллаз алай йисуз районда 32000 тонн векъи алаф гьазурун лазим я. Инанмиш я хьи, чавай пландилай артух 500-600 тонн алаф гьазуриз жеда.
Малдарвилел машгъул тир «АлиЯк» ООО-дихъ 112 гектар гзаф йисарин векьин, хсуси куьмекчи майишатрихъ 10 гектар къунж векьин ва «Фазилов Н. М.» КФХ-дихъ 151 гектар са йисан векьин уьруьшар ава.
Санлай къачурла, райондихъ 449 гектар (идакай 239 гектар — карханайринбур я) векьин уьруьшар ава. Векьер багъларай, чIурухъан чкайрай ва къурухрайни язава.
Алафар гьазурунин кIвалахар «АлиЯк» ООО-да иллаки тешкиллувилелди кьиле физва. Икьван чIавалди ана саки 3000 тонн сенаж гьазурнава.
Векьер ягъунихъ галаз сад хьиз, кьуранвай векьер туькера кьазва. И кардал пресс-подборщикар галай 14 трактор машгъул я. Гуьгъуьналлаз абур мал-къаради кьуьд акъудзавай чкайрал хутахзава, таяйра твазва. Икьван чIавалди районда 17000 тонн алаф гьазурнава.
Мал-къарадиз алафар гьазурунин кIвалахар хъсан еришар ва тешкиллувал аваз давам жезва.
Хазран Кьасумов
