4-августдиз Дербентдин къеледин мулкарал боксдай “Pravda Old School Boxing” лишандик кваз турнир кьиле фена. Адан сергьятра аваз, гьасиррал лезгийрин сейли спортсмен Дауд Кельбихановни (ам гьакIни Дауд Стханский тахаллусдалди машгьур я) экъечIна.
Камерундай тир Луис Тоби Онголодихъ галаз кьиле фейи бягьсина Д.Кельбиханова гъалибвал къачуна. Бине Мегьарамдхуьруьн райондин Гъепцегьрин хуьряй тир спортсмендиз камерунви магълуб авун патал анжах 45 секунд бес хьана. Бягьс сад лагьай раундда Онголо нокаутдиз ракъуруналди акьалтIна. Къейд ийин хьи, Дауд Кельбиханова им боксдай тухванвай сад лагьай бягьс я. Чна адахъ идалай кьулухъни мадни еке агалкьунар хьун алхишзава.
«Лезги газет»
