8-августдиз РД-дин Гьукуматдин Председателдин заместитель Ризван Гъазимегьамедован регьбервилик кваз Махачкъалада республикадин промышленность вилик тухунин рекьяй кардик квай фондунин советдин заседание кьиле фена.
Заседанидин сергьятра аваз “Фасадные системы”, “Строймет” ООО-рин ва “Кизлярэлектроаппарат” АО-дин векилри государстводин патай 20 миллион манатдин кьадарда авай пулунин куьмек гун патал чпин проектар теклифна.
Мисал яз, “Фасадные системы” ООО-дин векилди къейд авурвал, бюджетдай чара ийидай пулунин такьатрихъ карханадиз производстводин сергьятар гегьеншардай ва ПВХ-профилдикай ийизвай дакIарринни ракIаррин продукциядин кьадар гзафардай ниятар ава. Проект кьилиз акъудунин нетижада кIвалахдай алава 15 чка пайда жеда ва 2023-йисан эхирралди производстводин кьадар 92 миллиондив агакьарда.
“Кизлярэлектроаппарат” АО асул гьисабдай пар хкаждай ва пассажирар патал лифтер, подъемникар, эскалаторар гьазурунал машгъул жезва. Государстводин патай чара ийидай такьатрихъ и карханадизни производстводин сергьятар гегьеншариз ва 2024-йисуз АО-дин къазанжийрин умуми кьадар 439 миллиондив агакьариз кIанзава.
Фондунин экспертрин советди пуд проектдизни куьмек гудай къарар кьабулна.
Эхирдай Р.Гъазимегьамедова къейд авурвал, фондуни республикадин промышленностдин карханайриз куьмек гунин карда важиблу роль къугъвазва ва государстводин патай субсидияр кIанзавай карханайрилай къвезвай арзайрин кьадарни гьар йисуз артух жезва.
“Эгер алатай йисуз абурун кьадар 5-6 тиртIа, цIи 28-далай алатнава. И карди фондуни, талукь министерстводи, гьукуматди Дагъустанда авай промышленностдин карханайрин кIвалах вилик финиз итиж ийизвайди къалурзава”, — къейдна Р.Гъазимегьамедова.
Малумарайвал, 2023-йисуз федеральный бюджетдай промышленностдин карханайрин арада паюн патал Дагъустандиз 118 миллион манат пул ахъайда.
Агьмед Магьмудов
