Ван авуна

Алай йисан 13-февралдиз­ акъатай «Лезги газетдин» 6-нумрада Н. Ибрагьимован «Эмировар ва масабур» макъала акъат­нава. Гъалибвилин 80 йисан вилик Ватандин ЧIехи дяведа уьл­кведин азадвал, халкьдин саламатвал патал чанар къурбанд авур игит рухваяр рикIел хкун пара марифатлу кар я.

Н. Ибрагьимова Хпежрин хуьруьн Эмир бубадин сихилдай фронтдиз фейи ва къизгъин женгера телеф хьайи Ибрагьимоврин, Меликоврин, Эмироврин тIварар кьунва. Автордин фи­­кирдай са кьегьал хва акъат­нава. Эмиран птул Вагьид. Ам хуьряй гуьгьуьллувилелди фронтдиз фейи сифтебурукай сад тир. Гьа икI, Эмир бубадин сихилдай фронтда 12 кас хьана.

Салман Асланов

Н. Ибрагьимован къейд.

Дугъ­риданни, С. Асланова­ дуьз кхьизва. Вагьида, муькуь стхайрилай тафаватлу яз, ви­­­чин дах Гьамидан фамилия къачунвай. И кар себеб яз фикирдайни акъатна ам. Вагьид Гьамидов савадлу кас тир. Дяве башламиш хьайила, коммунист Вагьид хуьруьн «Социализмдин рехъ» колхоздин кьиле­ авай. Райондай атай векил­див­, жемятдин собранидал фронт­диз фидайбурун сиягь туькIуьрдайла, ада сифте вичин тIвар кхьиз тунай. «РикIел хуьнин ктабдин» VI томда адакай икI кхьенва: «Гьамидов Вагьид 1912-йисуз Хпежрин хуьре дидедиз хьана. Кьурагьрин­ РВК-ди 1941-йисуз армиядиз эвер гана. Жергедин аскер 1943-йисан февралдиз гел галачиз квахьна».