“Лезги газетдин” алатай йисан 3-сентябрдиз акъатай 36-нумрада Украинада машгьур хьайи лезги художникдикай кхьенвай “В.Аликберован аламатдин алемар” тIвар алай макъала чапнавай. Ана “Украинадин халкьдин художник” тIвар­цIиз лайихлу хьайи чи сейли ватанэгьли  Виталий Аликберован  бинеяр (хайи район, хуьр) гьинай ятIа тайинариз тахьанвайди къейднавай. Макъала акъатайдалай кьулухъ чи редакциядиз ери-бине Гъугъанрин хуьряй тир  Мегьамедов  Мамед муаллимдилайни Дагъустандин халкьдин шаир Майрудин  Бабахановалай Виталий Аликберовакай делилар авай чарар атана.

Ингье Мамед Мегьамедова вуч кхьизватIа: “…Макъалада ихтилат физвай кас зи къунши, рагьметлу Жамидин халудин хайи стхадин гада я. Адан стха Мурсал, художник Виталий Аликберован дах, Ватандин ЧIехи дяведин йисара женгинин офицер, ротадин командир тир. Дяведилай кьулухъ ада Украинада жуьреба-жуьре кIвалахарна. Дагъвиди ина хизанни кутуна. Гъурбатда авайтIани, Мурсал Аликберова хайи хуьр рикIелай алудзавачир. Ам са шумуд сеферда вичин хизанни галаз диде Шагьумугъадални стхадин хизандал кьил чIугваз Докъузпара райондин Гъугъанрин хуьруьз хтанай. 1951 ва 1958-йисара Ватандиз хтайла, ада хуьруьн мулкара авай булахар туьхкIуьр хъувунай, хуьруьнвийриз кьве шешелда авай кьван алукIдай пекер хканай. Дагъда авай вичин мукьва-кьилийрихъ галаз ада рагьметдиз фидалди алакъа атIаначир.

Адан хва Виталий, Одессада кIвалахзавай чIавуз, вичи тарс гузвай студенткадал эвленмиш хьана. Гьа чIавалай кьулухъ адаз мад вичин бубайриз муказ — Гъугъандал хтун кьисмет хъхьанач. Адан буба Мурсал Аликберов кьейила и кардикай Гъугъандал хабар агакьнай, амма хейлин себебар аваз хайи стхадивай ам эхиримжи рекье тваз Украинадиз физ хьаначир…”.

Мамед Мегьамедован кагъазда гьакIни  Мурсал Аликберован  женгинин рекьиз талукь делиларни авай. Гьа ихьтин малуматар Майрудин Бабахановани агакьарнавай. Абурай малум жезвайвал, Мурсал Аликберов 1914-йисуз Докъузпара райондин Гъугъанрин хуьре дидедиз хьана. Дяведин йисара ада старший лейтенантдин чинда аваз стрелковый ротадин командирдин везифаяр тамамарна.

Къейдна кIанда, армиядин жергейриз М.Аликбероваз 1935-йисуз эвер ганай. Ада 1939-1940-йи­сара финнрихъ галаз кьиле фейи дяведани иш­ти­ракна. Ватандин ЧIехи дяведин йисара гъугъанвиди партизанрин отрядда, Юго-Западный, Украинадин фронтра къуллугъна. 1941-йисуз Мурсал Аликберовал херни хьанай. Чи ватанэгьли “Киев хуьнай”, “Женгерин лайихлувилерай” медалриз, Яру Гъетрен ордендиз лайихлу хьанай.

М.Аликберован шабагьрин чарче ихьтин де­лиларни ава: “Гиринч хуьр патал кьиле фейи ­женгера, 1944-йисан 12-ноябрдиз юлдаш Аликберова жуьрэтлувилин, дирибашвилин, кьегьалвилин чешне къалурна. Вичин ротада авайбурукай сад лагьайди яз ам хуьруьз гьахьна, душман катдай чкадал гъана ва гьа са вахтунда 10 немсни тергна…”.

Агьмед  Магьмудов