7-февралдиз РД-дин Кьил Сергей Меликовани РФ-дин милли гвардиядин кьушунрин Кеферпатан Кавказдин округда регьбер Сергей Захарова Украинада кьиле физвай махсус серенжемда телеф хьайи Росгвардиядин къуллугъчийрин мукьва-кьилийрив государстводин шабагьар вахкана.
“Лезги газетдиз” РД-дин Кьилин пресс-къуллугъди хабар гайивал, мярекатда гьакIни генерал-майор Дмитрий Чистякова, Дагъустанда Росгвардиядин Управленидин кьил Александр Орехова, республикадин министерствойринни ведомствойрин регьберри иштиракна.
Мярекатдин иштиракчийрихъ элкъвена рахадайла, Сергей Меликова къейд авурвал, гьар са магьрумвал умуми хажалат я.
“Чпин бубадикай, хцикай, стхадикай, гъуьлуькай магьрум хьанвай гьар са хизан гьам милли гвардиядин кьушунрин регьберрин, гьамни республикадин кьилевайбурун кьетIен гуьзчивилик жеда. Чна идалай виликни Украинада кьиле физвай махсус серенжемдин иштиракчийрин хизанриз куьмекар гана, и кар идалай кьулухъни давамарда. За квевай гьялна кIанзавай месэлайрикай чаз хабар гун тIалабзава. Чна квез куьмекда. Чун квехъ гала”, — лагьана Дагъустандин Кьили.
Сергей Захарова телеф хьанвай аскеррин мукьва-кьилийриз башсагълугъвал гана, Ватандин вилик буржи тамамардайла, чанар къурбанд авур кьегьалрин экуь къаматар эбеди яз рикIера амукьдайди къейдна.
Гуьгъуьнлай абуру Росгвардиядин телеф хьанвай къуллугъчийрин мярекатдиз теклифнавай мукьва-кьилийрив “Жуьрэтлувиляй” орденар вахкана.
Чи мухбир
