Мусибатдин завал
6-февралдин экуьнахъ фад Туьркиядани Сирияда гужлу залзала хьана. Нетижада агъзурралди инсанар кьена. 8-февралдин делилралди, Туьркияда кьейибурун кьадар 8574-дав агакьнава, хасаратвилер хьайибурун кьадар — 49 133-дав. Идакай “Новости” РИА-ди хабар гана.
Залзала 7,8 баллдин гужлувал авайди тир. Туьркиядин президент Р.Т. Эрдоганан гафаралди, 1939-йисалай инихъ уьлкведа ихьтин къуватлу залзала хъхьанвачир. Гзафни-гзаф Газиантеп шегьердиз зарар хьана. Санлай къачурла, Туьркияда 6444 дарамат чкIана. Уьлкведа 7 йикъан яс малумарнава.
Сириядин Алеппо, Латакия, Хама, Тартус вилаятра залзаладикди 1250 кас кьена, 2000-далай гзаф ксариз хасаратвилер хьана.
Залзала гьакIни Ливанда, Иракда, Израилда, Гуржистанда, Абхазияда ва Сочи шегьерда хьана.
Гуьгъуьнлай, 7-февралдиз, Туьркияда мад 5,7 баллдин залзала хъхьана. И юкъуз Туьркиядин вице-президент Ф.Октая малумарайвал, харапIайрикай 8 агъзурдалай виниз ксар къутармиш хъувунва.
Махсус серенжемдикай
Херсондин областдин губернатордин везифаяр вахтуналди тамамарзавай В.Сальдодин гафаралди, Россиядин Яракьлу Къуватри мукьвара Херсон шегьер азад хъийида. Адан фикир “Новости” РИА-ди раижнава.
7-февралдиз РФ-дин оборонадин министр С.Шойгуди малумарайвал, РФ-дин кьушунрин кьетIи гьерекатрин нетижада Соледар, Клещеевка, Подгорное, Краснополье, Благодатное, Лобковое, Николаевка азад хъувуна. Чи аскерри Угледарда ва Артемовскда женгинин гьерекатар агалкьунралди давамарзава. Министрди къейд авурвал, США-дини адан амадагри Украинадин къалмакъал жезмай кьван яргъалди давам хьун патал алахъунар ийизва.
РФ-дин оборонадин министерстводи 7-февралдиз малумарай делилралди, махсус серенжем кьиле тухунив эгечIайдалай инихъ Россиядин Яракьлу Къуватри Украинадин 382 самолет ва 206 вертолет, зенитный ракетайрин 403 комплекс, пилот галачиз лув гудай 3027 аппарат, 7771 танк ва дяведин маса машинар, РСЗО-дин 1010 машин, артиллериядин ва маса 4020 яракь, военный махсус 8282 автомашин тергна.
Нетижалувал къалурна
НАТО-дик квай уьлквейри, Вашингтонди, Брюсселди Россия вилик финиф акъвазарун патал вири алахъунар ийизвай шартIара Россиядин сиясатдин системади вичин нетижалувал къалурна. Ихьтин фикир Госдумадин спикер В.Володина малумарна.
Нарази я
Великобританиядин премьер-министр Р. Сунака оборонадиз ийизвай харжарин кьадар артухаруник кьил кутазвач. И кар себеб яз, уьлкведа наразивилер, гьарай-вургьай гьатнава. Идакай “Новости” РИА-ди хабар гана.
“Адаз оборонадиз еке пулар чара ийиз кIан тахьуни офицеррик, парламентдин членрик къалабулух кутунва”, — кхьенва эвелан чешмеда.
Къейднавайвал, Украинадиз яракьар ракъуруни Великобритания “зайифарнава”. Идалай вилик Великобританиядин оборонадин министерстводи “Challenger 2” танкар Украинадиз ракъурдай къаст авайдакай малумарнай. И танкар Украинадив гатун вахтунда агакьда лугьузва.
РФ-дин оборонадин министерстводи къейднай хьи, Украина патал ракъурзавай яракьрин гьар са пар Россия патал къанундалди тергдай макьсаддиз элкъведа.
Грипп, коронавирус тайинардай тест
Россиядин “Система-биотех” тешкилатди инсандик грипп, COVID-19 ва мад ругуд вирус квани-квачни тайинардай сад тир тест арадал гъанва. Идакай “Новости” РИА-ди хабар гузва.
“Молекулярный биологиядин, генетикадин ва клеткайрин технологийрин хилерай цIийи затIар туькIуьрунал машгъул илимдин лабораторияди 30 декьикьадилай тIимил вахтунда коронавирус (штаммрилай аслу тушиз), аденовирус, грипприн жуьреяр ва масабур тайинариз жедай сад тир тест арадал гъанва”, — кхьенва чешмеда.
Тешкилатдин генеральный директор А.Сиразутдинова къейднавайвал, цIийи тестини начагъзавай касдиз талукь яз муьжуьд сеферда гьар жуьре ахтармишунар кьиле тухун тавунин мумкинвал гузва.
Аял къутармишна
США-дин Калифорния штатда пумади гьужумай аял дидеди къутармишна. Идакай “ABC 7 News” чешмеди хабар гана.
Агьвалат диде, чIехи буба ва аял нянихъ сейрдиз экъечIай вахтунда кьиле фена. “Аялди вилик чукурна ва садлагьана рекьел пайда хьайи пума кухунарна. Бахтунай хьиз, пума жегьилди тир”, — кхьенва чешмеда. Вагьши гьайванди аял чилел ярхарай макъамда дидеди ам викIегьвилелди къармахрай ахкъудна. Аялдиз еке зиян хьанач.
Гьазурайди – К.Ферзалиев
