И йикъара чав шаир, Россиядин журналистрин союздин член, муаллим, «Лезги газетдин» редакциядихъ галаз гьамиша алакъа хвейи хъуьлуьдви Саид-Агьмед Абдурашидович Абдурашидов рагьметдиз фена лагьай туькьуьл хабар агакьна.
Саид-Агьмед Абдурашидов 1932-йисуз Рутул райондин Хъуьлуьдрин хуьре дидедиз хьана. Хуьруьгрин мектеб куьтягьайдалай кьулухъ ада Буйнакскдин хуьруьн майишатдин техникумда, гуьгъуьнлай Дагъустандин педагогвилин институтда кIелна. Советрин Армияда Ватандин вилик вичин хиве авай буржи тамамарна. Сифтедай колхозда, гуьгъуьнлай мектебда кIвалахна.
1970-йисарилай ада чкадилай цIийи хабарар, хци месэлайриз талукь макъалаяр агакьарзавай. Гьа са вахтунда ада вичин къелем шииратдани, гьикаятдани ахтармишна. Нетижада 2005-йисуз «Фулфандин авазар» тIвар алай ктаб чапдай акъатна. 2015-йисуз муаллимдин «Хъуьлуьд ва хъуьлуьдвияр» ктабдизни экв акуна. Им ада эдебиятда, тарихда вичин гел, ирс тунва лагьай чIал я.
Газетдин редакцияди адан зегьмет ва алакьунар са шумуд сеферда гьуьрметдин грамотаяр, хъсан эсеррай премияр гуналди къейдна.
«Лезги газетдин» редакциядин коллективди Саид-Агьмед Абдурашидов рагьметдиз финихъ галаз алакъалу яз адан хизанриз, мукьва-кьилийриз башсагълугъвал гузва.
«Лезги газет»
