И йикъара чи арадай ДГТУ-дин профессор, технический илимрин доктор Расул Вагьидович Гьуьсейнов акъатна. Ам 1956-йисан 30-декабрдиз Ахцегь райондин Цуругърин хуьре дидедиз хьана. Дагъустандин политехнический институт вири вадар аваз акьалтIарай жегьилди кIелунар Ленинграддин Д. Ф. Устинован тIварцIихъ галай механический институтда аспирантурада давамарна. 1986-йисуз Р. В. Гьуьсейноваз — технический илимрин кандидатдин, 2001-йисуз доктордин дережаяр гана.
1987-йисалай ДГТУ-да кафедрадин доцент яз кIвалахиз гатIунна. 1999-йисалай ам «Организация и безопасность движения» кафедрадин профессор тир.
Алимдин регьбервилик кваз илимдин кьве хиляй аспирантри кандидатвилин диссертацияр кхьизвай. Р. В. Гьуьсейнован къелемдикай илимдин 140 макъала, монографияр хкатна, ам 10 патентдин автор тир. Ада гьамиша республикадин дережада аваз кьиле физвай илимдин проектра, конкурсра иштиракзавай.
Р. В. Гьуьсейнов Астрахандин гостехуниверситетда «Технология судостроения, судоремонта и организация судостроительного производства» ва «Судовые энергетические установки и их элементы (главные и вспомогательные)» пешекарвилерай илимрин кандидатвилин ва докторвилин диссертацияр хуьнай кардик квай диссертацийрин советдин ва Санкт-Петербургдин илимдинни техникадин Академиядин член тир. Адаз «Дагъустан Республикадин лайихлу изобретатель» тIвар ганвай.
ДГТУ-дин ректоратди ва професорринни преподавателрин коллективди, Расул Вагьидович Гьуьсейнов рагьметдиз финихъ галаз алакъалу яз, адан хизанриз, вири мукьва-кьилийриз башсагълугъвал гузва. Алимдин экуь къамат чи рикIера амукьда.
«ЛГ»
