Са тIимил йикъар идалай вилик Махачкъалада, Елена Исинбаевадин тIварунихъ галай стадиондал, ГТО-дин нормаяр тамамарунай Дагъустан Республикадин чемпионат кьиле фена. Ана чпин яшар 18-далай 70 йисал кьван ва гьадалайни виниз тир ксари, гьа гьисабдай яз спортсменри, ветеранрини иштиракна. Абурун арада 10 касдикай ибарат тир Сулейман-Стальский райондин командани авай.

Акъажунра чемпионатдин иштиракчийри 100, 2000 ва 3000 метрийриз  чукурунай, турникдал чене акъудунай, алай чкадилай яргъаз хкадарунай, снаряд яргъаз­ гадарунай, пневматикадин винтовкадай лишанар ягъунай, кроссдай — санлай 15 жуьредай ала­кьунар къалурна. ИкI, Сулейман-Стальский райондин вири спортсменри къизилдин значокар къачун патал ГТО-дин  нормативар вахкана. Кьилди къачуртIа, ГТО-дин нормаяр тамамарунай зегьметдин ветеран  Ягъибег  Ягъибегов  чемпионатдин — 1, Кьасумхуьруьн 1-нумрадин ДЮСШ-дин директор Сергей Мирзалиев 2-дережайрин дипломриз лайихлу хьана.

Райондин кьил Нариман Абдулмуталибова и мукьвара шад гьалара Ягъибег Ягъибеговав ва Сергей Мирзалиевав шабагьар вахкана, агалкьунар мубаракна.

Къейд ийин хьи, Ягъибег Ягъи­бегова ГТО-дин нормаяр вахкунай 2018-йисуз къизилдин значок ва Дагъустан Республикадин чем­­пионвилин тIвар къачунай.  “Яшар — Аллагьдилай, кьуьзуь­вал­ жувалай аслу я” гафар рикI алаз тикрарда Ягъибег Рамазановича. Ада  алай вахтунда райондин Общественный палатадин председателдин заместителвиле кIва­лахзава.

Чаз малум хьайивал, Я.Ягъи­бегов школада кIелзавай йисара — кьезил атлетикадал, Советрин Армиядин жергейра къуллугъдай ва Махачкъалада кIел­дай йисара боксдал машгъул хьана. Боксдай 1-разряд авай ада кIелунин идарайрин арада кьиле фейи Дагъус­тан Республикадин чемпионатда — 3,  Германияда кьиле фейи Варшавский икьрардин уьлквейрин дуствилин армийра къуллугъзавайбурун чемпионатда 2-чкаяр кьунай.

Хазран Кьасумов