Хванахвавал, мугьманпересвал дагъвийриз, кьилди къачуртIа, лезгийриз дегь девиррилай хас я. Бубайрин баркаллу адетриз къенин йикъарин несилрини вафалувал къалурзава. ИкI, Кьасумхуьруьн 1-нумрадин юкьван школадин ва Кьурагь райондин КIирийрин Россиядин Игит Зейнудин Лукьманович Батманован тIварунихъ галай школа-интернатдин арада дуствилин, хванахвавилин алакъаяр аваз са шумуд йис я. Мукьвара Кьасумхуьруьн 1-нумрадин юкьван школадин муаллимрикай ва кIелзавайбурукай ибарат тир делегация (22 кас), кьиле школадин директор Зубаил Устаев аваз, КIирийрин школа-интернатдиз мугьман хьана. Ина мугьманар хушвилелди кьабулна, директор Надир Тагьирова школада итижлу экскурсия тешкилна. Адалай гуьгъуьниз кьве школадин кIелзавайбурун арада жуьреба-жуьре конкурсар, школайрин командайрин арада футболдай акъажунар тухвана. Тафаватлу хьайи школьникриз ва футболдин командайриз грамотаяр, рикIел аламукьдай пишкешар гана.
Шад къугъунрилай гуьгъуьниз кьве школадин муаллимрин ва кIелзавайбурун иштираквал аваз «классдин сят» кьиле фена. Н.Тагьирова школадин кIвалахрикай, Россиядин Игит Зейнудин Батманован уьмуьрдин рекьикай, ада къалурай кьегьалвилерикай гегьеншдиз суьгьбетна.
— 2015-йисан 15-майдиз чкадин тамарин майишатда инспекторвиле кIвалахзавай Зейнудин Лукьмановича къалурай жуьрэтлувиликай вири Россияда ва адалай яргъарани хабар ава. Таза аял гвай дишегьлини итим яракьламиш хьанвай бандитрин гъиляй акъудун патал ада вичин чан къурбандна. Хуьруьнвийриз ам михьи рикI авай, гъил ачух, къени кас яз чидай, гьахьтин кас яз ам инсанрин рикIерани амукьда. Зейнудин Батманован кьегьалвал Россиядин Федерациядин Президент Владимир Путинан Указдалди Россиядин Игит лагьай тIвар гуналди (кьейидалай кьулухъ) къейдна. Зейнудин Лукьмановичан игитвилел, адан тIвар чи школадал хьунал чна дамахзава, — къейдна ада.
Надир Тагьирова Кьасумхуьруьн школадин кIелзавайбурун са жерге суалризни жавабар гана.
Мугьманрин делегациядин кьил Зубаил Устаева чеб хушвилелди ва шад гьалара кьабулунай школа-интернатдин муаллимриз ва кIелзавайбуруз чухсагъул лагьана, и мукьвара 90 йисан юбилей къейднавай Сулейман-Стальский райондин тарихдикай, къенин йикъара районда яшайишдин рекьяй тухузвай кIвалахрикай, гьакIни школадихъ эхиримжи йисара хьанвай хъсан нетижайрикай лагьана.
Школада тухвай мярекатрилай гуьгъуьниз вири Россиядин Игит Зейнудин Батманован хизандиз мугьман хьана. Игитдин уьмуьрдин юлдаш Жамила Батмановади ва багърийри мугьманар шадвилелди кьабулна.
Кьасумхуьруьн 1-нумрадин юкьван школадин директордин заместитель Айишат Кьасумовадин гафаралди, КIирийрин школа-интернатдиз ва Россиядин Игит Зейнудин Батманован хизандиз мугьманвилиз фин школада кIелзавайбур патал яргъалди рикIел аламукьдай вакъиа хьана. Идалайни гъейри, Надир Тагьирова ва Зубаил Устаева гуьруьшдин эхирдай лагьайвал, мектебрин арада авай дуствилин, хванахвавилин алакъаяр идалай кьулухъни давамарда.
Чи мухбир
