И йикъара Адыгеядин меркез Майкоп шегьерда, «Якуб Коблеван» спортдин дворецда, дзюдодай Россиядин чемпионат кьиле фена. Ана чи уьлкведин жуьреба-жуьре пипIерай тир 524 спортсменди, гьа гьисабдай яз 200-дав агакьна дишегьлийрини, чпин устадвал къалурна. И чемпионатда уьлкведин маса регионрин патай экъечIнавай чи ватандашрини иштиракна. Абурукай кьведа — Ренат Саидова ва Саид Гьажиева 100 кг-дилай гзаф заланвал авайбурун арада буьруьнждин медалар къазанмишна. Къуй чпихъ гележегда чи халкьдин руьгь хкаждай агалкьунар мадни гзаф хьурай!
РикIел хкин, кьве спортсмендин агалкьунрикайни чна виликдай хабарар гайиди я. Амма къенин макъалада чаз газет кIел-завайбур Москвадин патай экъечIзавай С.Гьажиевахъ (шикилда) галаз мукьувай танишариз кIанзава…
Саид Москвадин областдин Долгопрудный шегьерда 2000-йисуз дидедиз хьана. Адан бубадин ери-бине Ахцегьай я. Гьеле 5 йиса авай аял тирла, Саид спортдал машгъул жез эгечIна. Сифтедай хайи шегьерда, 2011-йисалай Москвада, ЦСКА-да, ада тренеррин — Александр Хаустован, Петр Щербининан ва Кирилл Жукован гъилик устадвал хкажзава. ВикIегьвал, къастунал кIевивал, четинвилериз дурум гуз алахъзавай, алакьзавай Саида хейлин акъажунра гъалибвилер къазанмишна. Кьилди къачуртIа, 2017-йисуз адакай 18 йисал къведалди яшара авайбурун арада дуьньядин кIвенкIвечивал патал кьиле фейи акъажунрин гъалибчи хьана. Алай йисуз Европадин Кубок патал Оренбург шегьерда кьиле фейи акъажунрани ада буьруьнждин медаль къачуна. Ам Москвада ва санлай Москвадин областда кьиле фейи Вирироссиядин хейлин турниррин гъалибчини я.
Мектеб акьалтIарайла, Саида яргъалди фикир тавуна, вичин уьмуьр спортдихъ галаз алакъалу авун кьетIна, алай вахтунда ам Россиядин физический культурадин госуниверситетдин (РГУФК) студент я.
Рагнеда Рамалданова
