Футболдай Махачкъаладин “Олимп” командадикай Вирироссиядин аялринни жаванрин “Тумаждин туп — Кубок Coca-Cola” акъажунрин гъалибчи хьана. Кар алай матчар футболдай дуьньядин чемпионатдин вахтунда ишлемишай Дондал алай Ростовда авай “Олимп-2” майдандал кьиле фена.
Финалда дагъустанвийри Новгороддин областдин Старая Русса шегьердин патай векилвалзавай командадин винел 3:0 гьисабдалди гъалибвал къазанмишна. Пуд лагьай чкадиз лайихлу хьайи Воронеж шегьердай тир “СОШ-73-Патриот” командадиз Новосибирскдин “Энергия” кумукьна. Сифтегьан пуд чка патал 71 командади бягьс тухузвай.
Гъалибчияр футболдай Россиядин хкягъай милли командадихъ галаз гуьруьшмиш хьана, тренер Станислав Черкесовахъ галаз рикIел аламукьдай шикилар яна.
Къейд ийин, “ДЮСШ “Олимп” Махачкъалада кардик кваз, ана тежрибалу тренерри жегьилриз футболдин сирер чириз гзаф йисар я. Кьиле чи ватанэгьли Вадим Зиятханов авай и спортшколадин тренерар тир Гьуьсейн Мегьамедован, Сергей Чистякован, Рамазан Гьажибалаеван гъилик вердишвилер къачузвай аялри республикадин футболдин тарихда сифте яз ихьтин агалкьун къазанмишнава.
В.Зиятханова къейдна: “Къенин чи гъалибвилик, гьелбетда, Махачкъала шегьердин администрациядин спортдин, туризмдин ва жегьилрин крарин рекьяй комитетдин председатель Марат Ибрагьимован чIехи пайни ква. Ада спортдин гележег авай жуьрейриз ва абур виликди тухуниз, меркездин сергьятра жегьилри сагълам уьмуьр куьчуьрмишуниз артух фикир гузва. И карди чи зегьметар гьакI фидач лагьана инанмишвал гузва, мадни гзаф алахъна, жегьилрихъ галаз кIвалахдай ашкъи кутазва”.
Эмираслан Шерифалиев
