Са тIимил йикъар идалай вилик Подмосковьедин Наро-Фоминск шегьерда грэпплингдай Вирироссиядин кьве турнир — жаванрин арада кIвенкIвечивал ва Россиядин Кубок патал акъажунар кьиле фена. Чи уьлкведин жуьреба-жуьре пипIерай тир рекорддин кьадар спортсменри чпин устадвал къалурна.
РикIел хкин: алай йисуз турнир Уфа шегьерда кьиле фин гуьзлемишзавайди тир, амма эпидемиологиядин четин гьалар фикирда кьуналди, и акъажунар Наро-Фоминск шегьердиз хкун хъсан акуна. ИкI, и шегьердин кьил Шамнэ Роман Львовичан чалишмишвилерин нетижада са куьруь вахтунда турнир тешкилиз ва виниз тир дережада ам кьиле тухуз алакьна. Аялринни жегьилрин арада грэпплинг эхиримжи йисара йигиндаказ вилик физвайди сир туш. Идахъ галаз сад хьиз, спортдин и жуьредай акъажунарни (иштиракчийрин кьадар гзаф, абурун арада чIехи конкуренция хьунилай аслу яз) лап къизгъиндаказ кьиле физва. И акъажунрин лайихлувал мадни адакай ибарат тир хьи, финалдиз акъатайбуруз дуьньядин кIвенкIвечивал патал акъажунра иштиракдай мумкинвал жезвай, идани спортдин серенжемдин важиблувал мадни хкажзавай. Эхиримжи йисара, чна винидихъ лагьанвайвал, спортдин и жуьредай иштиракзавай спортсменрин кьадар гзаф хьуниз килигна, спортдин акъажунар 4 юкъуз кьиле тухузвай. Амма цIи лагьайтIа, эпидемиологиядин гьалар фикирда кьуналди, и вахт тIимиларнавай.
Шадвилелди а кардикай хабар гуз кIанзава хьи, и акъажунра иштиракайбурун ва гъалиб хьайибурун арада чи ватандашарни авай. ИкI, Расул Мамедбегова (77 кг-дин заланвал авайбурун арада) ва Артур Агъаширинова (62 кг-дал къведалди заланвал авайбурун арада) 1-чкаяр кьуна, абуру Россиядин кубокар къазанмишна. Чи мад са ватандашди — Абдулгьашим Абдуллаева — грэпплингдин No Gi ва Gi жуьрейрай буьруьнждин кьве медаль къазанмишна.
«Лезги газет»
