Са шумуд югъ идалай вилик Краснодарда Кьиблепатан футболдин Лигади (ЮФЛ) шегьердин любительский Лигадин ва футболдин “Краснодар” клубдин куьмекни галаз футболдай Россиядин Кьиблепатан регионрин 2017-йисан уртах Кубок къазанмишун патал кьиле тухвай акъажунра 13 командади иштиракна. Абурун арада Сулейман-Стальский райондин Агъа СтIалдилай тир “Ашага-Сталь” командани авай.
Шад жедай кар ам я хьи, вири санлай 13 командадин футболистри чпин устадвал къалурай и акъажунра “Ашага-Сталь” командади Кубок къазанмишна, ам Россиядин чемпионатдиз акъатна.
Алай вахтунда “Ашага-Сталь” командадин футболистри 23 ва 24-сентябрдиз Москвада футболдай кьиле фидай Россиядин чемпионатдиз гьазурвал аквазва. Чи мурад абурухъ уьлкведин кесерлу майданрани еке агалкьунар хьун я.
Рагнеда Рамалданова
