Алатай гьафтеда Ингушетиядин Назрань шегьерда, “Магас” тIвар алай Спортдин дворецда азаддаказ кьуршахар кьунай кьиле фейи Россиядин 25 лагьай чемпионатда Дагъустандин хкянавай командади 14 медаль (абурукай къизилдинбур — 4, гимишдинбур — 6, буьруьнждинбур — 4) къазанмишна. Кьве юкъуз давам хьайи ва гзаф къизгъиндаказ кьиле фейи акъажунра Россиядин чемпионвилин тIварариз Заур Угуев (57 кг), Гьажимурад Рашидов (61 кг), Мегьамедгьабиб Кадимегьамедов (70 кг), Абдулрашид Садулаев (97 кг) лайихлу хьана.
Лугьун лазим я хьи, Ингушетияда азаддаказ кьуршахар кьунай Россиядин чемпионат сад лагьай сефер яз, и республикадин 25 лагьай чемпионат Ингушетиядин 25 йис тамам хьунин юбилейдин сергьятра аваз кьиле тухванвай. Акъажунра Россиядин 40-далай виниз регионрай тир 300-дав агакьна спортсменри чпин устадвал къалурна, бягьсериз тамашиз атанвай ксарин кьадарни гзаф тир. 86 ва 37 кг-дин заланвилин категорийрай иштиракзавай спортсменрин кьадар иллаки гзаф тир, гьаниз килигна а категорийрай бягьсерни къизгъиндаказ кьиле фена. Акъажунрин кьвед лагьай юкъуз чи ватандаш, азаддаказ кьуршахар кьунай гзаф турниррин, гьа гьисабдай яз Ярыгинан Гран-Придин гъалибчи, Европадин чемпион Даурен Куругълиевани (86 кг) вичин алакьунар къалурун чна вилив хуьзвай, амма акъажунрин 8 паюникай сад лагьай пай патал бягьсера ам дагъустанви А.Мусалалиеваз кумукьна.
Россиядин чемпионатда Олимпиададин чемпион Абдулрашид Садулаевани иштиракна. Спортдин виридалайни кьилин къугъунрилай гуьгъуьниз ам сад лагьай сефер яз гьасиррал эхкъечI хъувунвай, вични заланвилин цIийи категориядай: 86 кг гила ада 97 кг-далди эвезнава. Нетижайри къалурайвал, и категориядал элячIуналди, ам ягъалмиш хьанач. И чемпионатда ада, вири санлай, 43:0 гьисабдалди гъалибвал къазанмишна. Финалда ада вичин къуватар кьве сеферда Европадин чемпионатрин призёр Владислав Байцаевахъ галаз ахтармишун лазим тир. (В.Байцаев лагьайтIа, 97 кг-дин заланвилин категориядиз “эвичIнава”. Икьван чIавалди ада гзаф заланвал авай спортсменрин арада къуватар ахтармишзавай). Россиядин чемпионвилин тIвар къазанмишун патал бягьс В.Байцаева 4:1 гьисабдалди тухузвай, амма А.Садулаева гъалибвал вичин гъиляй акъатуниз рехъ ганач, нетижада бягьс 8:7 гьисабдалди акьалтIна.
Къейд авун лазим я хьи, Россиядин чемпионатда кIвенкIвечи чкаяр кьур спортсменри алай йисан августдиз Францияда кьиле фидай дуьньядин чемпионатда чпин устадвал къалурда.
Чи корр.
