Мегьарамдхуьруьн райондин сайтда хабар ганвайвал, алай йисан 16-июндиз райондин администрацияда спортсменар тир Даурен Куругълиев, Икрам Алискеров, Гьажидауд Гьасанов, Мурадхан Зингаров шад гьалара кьабулна. Абурув шабагьар вахкуниз талукьарнавай мярекат райондин кьил Фарид Агьмедова ачухна ва кьилени тухвана. Ана райондин жавабдар къуллугъчийри, МР-дин депутатрин Собранидин председателди, райондин спортдин отделдин директорди, тренерри, журналистри ва маса ксари иштиракна.
Мярекат ачухдай вахтунда Фарид Агьмедова викIегь ва сагълам несил чIехи авун ва тербияламишун, спортсменриз алакьдай вири жуьрейрин куьмекар гун, физический культура ва спорт вилик тухунал гьалтайла вири серенжемрин ва теклифрин тереф хуьн райондин кьиле авай ксари эвелимжи нубатда фикир гана кIанзавай месэлаяр тирди къейдна.
Спорт вилик тухуник чIехи пай кутунай ва кьетIен лайихлувилерай гьуьрметдин грамотаяр ва пулдин премияр Фарид Агьмедова азаддаказ кьуршахар кьунай Европадин чемпион Даурен Куругълиевав ва какахьай бягьсерай 2013 ва 2014-йисара дуьньядин Кубокдин сагьиб, Европадин ва дуьньядин чемпион, кесерлу гзаф турнирра гъалибвал къазанмишнавай Икрам Алискеровав вахкана.
Спорт вилик тухуник чIехи пай кутунай ва кьетIен лайихлувилерай Фарид Загьидиновича райондин кьилин патай чухсагъул малумарнавай Чар ва пулдин премия какахьай единоборствойрай международный кесерлу турнирдин гъалибчи Гьажидауд Гьасановав ва Белград шегьерда азаддаказ кьуршахар кьунай 16 йисал къведалди яшара авай жа-ванрин арада Европадин кIвенкIвечивал патал акъажунра гъалиб хьайи Мурадхан Зингаровавни вахкана.
Райондин кьили спортсменрихъ Олимпиададин къугъунрани агалкьунар хьана кIанивилин келимаяр лагьана. КIватI хьанвай спортсменрихъ элкъвена ада еке дережайриз акъатнавай абурулай акьалтзавай несилди чешне къачузвайди ва гьавиляй инлай кьулухъни абуру жегьилриз лайихлу чешне къалурун лазим тирди къейдна. Фарид Загьидиновича абуруз вири дережайра вичин тIем акакьдай куьмекар гудайди хиве кьуна, кьилинди, спортдивай къерех тахьун, анжах виликди фин лазим тирди къейдна. Мярекатдал кIватI хьанвайбуру спортсменар тебрикна, абурун тIварарихъ хуш келимаяр лагьана.
Шад гьалара кьубулай спортсменри чпин нубатдай райондин кьиле авай ксариз чухсагъул лагьана. Кьилди къачуртIа, тренер Эльдар Гьасанова спортсменриз куьмекар гунай Фарид Агьмедоваз чухсагъул малумарна, алай девирда куьмек галачиз спортдин кьакьан кукIушар муьтIуьгъариз хьун мумкин туширди къейдна.
Гуьгъуьнлай мярекат Ф.Агьмедован кабинетда давам хъхьана, спортсменрин гьевес хкажзавай шадвилерикайни чIехи спортдин четин месэлайрикай, чпин тежрибадикай, гележегдин планрикай суьгьбетарна.
