«Ихьтин лишандик кваз чи уьлкведа, гьа гьисабдай яз Дагъустандани, Россиядин зегьметдин ва яшайишдин рекьяй хуьдай министерстводин агьалияр кIвалахдалди таъминаруниз талукьарнавай еке проектдин — 3-сеферда тешкилзавай мекерадин — региондин сад лагьай пай кьиле фида. Виликан йисарив гекъигайла, цIи и серенжемдин сергьятар мадни гегьенш жеда. Республикадин меркезда, Дербент ва Хасавюрт шегьерра хьиз, ам 44 райондани кьиле тухун пландик кутунва. Кьве паюникай ибарат тир мекерадин региондин пай 18-апрелдиз ва федеральный дережадин пайни 27-июндиз кьиле фида». Идакай 24-мартдиз Махачкъалада «Дагъустан» РИА-дин майдандал кьиле фейи гуьруьшдал Дагъустандин зегьметдин ва яшайишдин рекьяй вилик финин министрдин заместитель, статс-секретарь Жабраил Жабраилова ва зегьмет чIугун патал санай масаниз финин рекьяй ва кIвалахдалди таъминарзавай ксарихъ (работодатели) галаз алакъалу ийидай отделдин начальник Мажид Алиева гегьеншдаказ малуматар гана.
Вирироссиядин мекерадин региондин паюнин кьилин майдан Махачкъалада, А. Салаватован тIварунихъ галай Къумукьрин муздрамтеатрда, пакаман сятдин 10-даз (регистрация — сятдин 10-дан зураз) ачухда. Дербент ва Хасавюрт шегьерра ва республикадин 44 муниципалитетда мекера агьалияр кIвалахдалди таъминардай центрайра кьиле фида. Россиядин Президентди Ватан хуьзвайбурун йис яз малумарнавай цIинин йисуз СВО-дин ветеранриз ва адан иштиракчийрин хизанриз кIвалах жагъурунизни кьилин фикир гуда.
Мугьманрин суьгьбетдай малум хьайивал, мекеради неинки са чи республикада, гьакI Россиядин вири, гьа гьисабдай яз цIийи регионрани кIвалахдал акъваздай мумкинвал гузва. Виликамаз авай делилралди, мукьвара кьиле тухудай мекерада, республикадин кIвалах теклифзавайбуру 2000-далай, федеральный дережадани 10 агъзурдалай виниз кIвалахдай чкаяр теклифда.
— Вирироссиядин мекерадин макьсад кIвалах теклифзавайбурни кIвалах жагъурзавайбур санал кIватIуникай ибарат я. Адан сергьятра аваз, кIвалах жагъурзавай ксаривай са шумуд работодателдихъ, гьа гьисабдай яз чи республикадилай къеце авайбурухъ галазни суьгьбет (собеседование) кьиле тухудай, кIвалахдал акъвазайла, гьукуматдин патай агакьдай куьмек, кIвалахдин шартIар ва ихьтин амай месэлаярни чкадал виликамаз чирдай мумкинвал жеда. Мекера чи уьлкведин вири регионра гьа са вахтунда кьиле тухуда. ЧIехи и серенжемдин сергьятра аваз уьлкведин чIехи компанийри кIвалахдай чкаяр ва кIвалахдин рекьяй винелди хкаж жедай мумкинвилер теклифда, — раижна Ж. Жабраилова.
Мажид Алиеван гафарай мадни малум хьайивал, мекерада, кIвалахдихъ къекъвезвайбурувай хьиз, студентривай, школьникривай ва абурун диде-бубайривайни иштиракиз жеда. И кар патал абуру чеб яшамиш жезвай чкадин агьалияр кIвалахдалди таъминардай центрадиз фена ва я «Работа России» порталда (горячий линиядиз зенгна), арза гун герек я.
— Йисалай-суз мекерада иштиракзавай работодателрин кьадар артух жезва. Алай йисуз ана Дагъустандин чIехи саки вири карханайри иштиракда. Иник оборонадин промышленностдин, хуьруьн майишатдин, туризмдин, общепитдин хилен карханаяр акатзава. КIвалахдихъ къекъвезвайбуруз хьиз, чна школада чIехи классра кIелзавай аялризни, абурун диде-бубайризни иниз атун теклифзава. ГьикI хьи, ачух и майданди абуруз авай кьван пешейрихъ галаз мукьувай таниш жедай, рикIиз кIани пеше хкядай мумкинвал гузва. Са гафуналди, мекера неинки работодателри кIвалах теклифзавай, гьакIни алай аямдин кIвалахдалди таъминардай къуллугърин мумкинвилерихъ галазни танишардай хъсан майдан я, — къейдна Мажид Алиева.
Мугьманрин гафарай мадни малум хьайивал, алай вахтунда инженервилин ва рабочий вири пешейрин сагьибрихъ, гьам чи республикада, гьамни адалай къеце еке игьтияж ава. Гьаниз килигна, мекерадин сергьятра аваз профориентациядин, чирвилер гудай идарайрин майданрини кIвалахда. Анрал пешекарвал гьикI хкаждатIа, алай аямда игьтияж авай, яни цIийи пешедай чирвилер гьикI къачудатIа чирдай мумкинвални жеда. Шаксуз, кIвалах дегишардай ният авай ва гьакIни кIвалахдин рекьяй виликди физ кIанзавай ксар патал ихьтин мумкинвилихъ еке метлеб ава.
Къейд. Мекера «Кадры» милли проектдин сергьятра аваз кьиле тухузва. 2024-йисуз адан сергьятра аваз 500 дагъустанвидиз кIвалах жагъана. ЦIи лагьайтIа, мекерадин тешкилатчийри и кьадар мадни артух хьуник умуд кутунва. Мекера гьар йисуз кьиле тухудайвал я.
Рагнеда Рамалданова
