1-октябрдиз къанун-къайда хуьдай органрин къуллугъчийри Избербаш шегьердин кьил Мегьамед Исакьов кьуна. РФ-дин Силисдин комитетдин РД-да авай Управленидин пресс-къуллугъди хабар гузвайвал, М. Исакьовал чIехи кьадарда аваз ришвет къачунай шак физва, адалай, РФ-дин УК-дин 290-статьядин 6-паюнал асаслу яз, уголовный дело къарагъарнава.
Силисди кьиле тухванвай кIвалахрин нетижада малум хьанвайвал, 2019-йисуз М. Исакьова са карханадиз, документар къайдадик квачиз, кIвалер эцигдай ихтиярар гана. Идай эцигунардай карханадин векилди адаз 1,5 миллион манат пулни вичин къимет 2,4 миллион манат тир иномарка гана.
Мегьамед Исакьов 1-октябрдин экуьнахъ, ам кIвалахал тефенмаз, вичин кIвале кьуна. Эгер М. Исакьован тахсиркарвал субут хьайитIа, адаз уголовный дело къарагъарнавай статьядин бинедаллаз 8 йисалай 15 йисал къведалди кар атIун мумкин я.
Агьмед Магьмудов
