28-сентябрдиз Дагъустан Республикадин Кьил Сергей Меликова ЦIийи Хушет поселокда АЗС хъиткьинунихъ галаз алакъалу пис нетижаяр арадай акъудуниз талукь оперативный штабдин заседание кьиле тухвана. Адан кIвалахда гьукумдин ва къайдаяр хуьдай органрин кьилери иштиракна.
Федеральный шегьреда АЗС хъиткьинуникди 13 кас телеф хьана, 20 касдилай гзафбуруз тIарвал гана. И юкъуз Дагъустанда яс кьун малумарна.
«Чун и мусибат гьикI арадал атанатIа, гьадан гъавурда гьатна ва чна адан пис нетижаяр гьикI арадай акъуддатIа, кIеве гьатай инсанриз гьихьтин куьмекар гудатIа, тайинарна кIанда. Идахъ галаз сад хьиз гележегда ихьтин мусибатрин вилик пад кьунин серенжемарни кьабулун лазим я», — лагьана Сергей Меликова.
Региондин МЧС-дин регьбер Нариман Къазимегьамедова малумат гайивал, АЗС хъиткьиннамазди и чкадал, геж тавуна, тади къуллугърин векилар атана. Кьве сятда абуру цIай хкадарна, хъиткьинунин чIуру нетижаяр арадай акъудунал 230-далай гзаф инсанар машгъул хьана. Ацахьнавай чкаяр михьун давамарна.
«Заз инал цIаяр хкадардайбуру ва МВД-дин ДПС-дин векилри санал кIвалахунин виниз тир дережа къейд ийиз кIанзава. Абуру гъиле-гъил аваз шегьре агална ва авариядинни къутармишунин къуллугъар АЗС хъиткьинай чкадив фад агакьардай вири жуьредин серенжемар кьабулна. Ихьтин вахтара кIеве гьатнавай инсанриз куьмек гуз гьазур гуьгьуьллубурузни за сагърай лугьузва», — хълагьна Сергей Меликова.
Фад силис кьиле тухудай дестеди АЗС хъиткьинунин себебар чирзава. Идан гьакъиндай кьиле тухузвай кIвалахдикай къайдаяр хуьдай органрин регьберри суьгьбетна.
Республикадин Кьили мусибатдин себебар чирун патал дикъетдивди ахтармишунин кIвалахар тешкилун тапшурмишна.
ТIарвал гайи инсанрин гьакъиндай малумат РД-дин здравоохраненидин министрдин заместитель Патхула Патхулаева гана. Адан гафаралди, сагъардай идарайра тIарвал гайи кьуд кас ава. Абурун уьмуьрдиз хаталувал авач. Медицинадин рекьяй абуруз вири жуьредин куьмекар гузва. Дарманрикай, рапарикай дарвал авач.
Сергей Меликова поликлиникайра медицинадин рекьяй куьмек гайи инсанрин сагъламвилелни гуьзчивал тухун лазим тирди къейдна.
Къарабудахкент райондин кьил Магьмуд Амиралиева мусибатдин дуьшуьшдин пис нетижаяр арадай акъудзавай гьалдикай ихтилатна. Тади къуллугъдин векилриз куьмек яз, районди са шумуд кран, самосвалар ва погрузчик кардик кутуна.
Рахайбурун ихтилатриз баянар гуналди, Сергей Меликова муниципальный гьукумдин регьберрал АЗС-дин къваларив гвай кIвалерин гьални ахтармишун тапшурмишна.
Заседанидал малумарайвал, телеф хьайибурун багърийриз — са миллион манат, тIарвал хьайибуруз 250-500 агъзур манат гудайвал я.
Сергей Меликова гъиле-гъил аваз къутармишунин кIвалахар кьиле тухвай вири къуллугърин векилриз сагърай лагьана ва гьукумдин органрал тамамардай кIвалахар тапшурмишна.
Гуьгъуьнлай региондин Кьили федеральный ва региондин СМИ-рин векилрин суалриз жавабар гана.
Гьар садан дердиникай хабар кьуналди, дуьшуьшдик акатайбурухъ рикI куналди, ватанэгьлийриз ва телеф хьайибурун багърийриз, мукьвабуруз за башсагълугъвал гузва. Дуьшуьшдик акатай вири фад сагъ хъхьана кIанзава. Заседанидал чна кIеве гьатай инсанриз куьмек гунин, техногенный авария арадал атунин себебар чирунин месэлаяр гьялна.
РД-дин здравоохраненидин министерстводин кIвалахни къейд ийиз кIанзава. Ада тади куьмекдин герек кьадар машинралди таъминарна. ДПС-дин къуллугъчийри чпин кIвалах лазим тирвал кьилиз акъудна. Машинрин цIиргъ физвай шегьре гъиле-гъилди агална, АЗС хъиткьинай чкадал махсус машинар ва къутармишдай инсанар агакьдайвал авуна. Волонтеррин иштираквални къейд ийиз кIанзава. Ихьтин мусибатар хьайила, абуру чпелай алакьдай куьмекар гузва. Хъиткьинунин пис нетижаяр арадай акъудун патал зегьмет чIугур вири сагърай. Гьа са вахтунда лугьуз кIанзава хьи, чна ихьтин мусибатрин вилик пад вири серенжемралди кьун лазим я», — лагьана Сергей Меликова.
Хийир Эмиров
