СтIал Сулейманан районда мотострелковый бригададин командир Марат Гьажибалаев эхиримжи сефердиз рекье хтуна. Херсондин областдин мулкуна кьиле фейи къизгъин женгина Марат Гьажибалаев телеф хьана. Ам хайиди тир Зизикрин хуьре кучукна. Кьегьал хва эхиримжи сефердиз рекье тваз багърияр, дустар, хуьруьнвияр ва райондин администрациядин векилар атанвай.
Дагъустан Республикадин Кьил Сергей Меликова вичин телеграм-каналда Марат Гьажибалаеван багърийриз ва мукьва-кьилийриз башсагълугъвал гана ва игит хцикай ихьтин гафарни кхьена.
“…Къизгъин женгина телеф жедалди вилик Марата вичин дустариз, багърийриз, чидайбуруз рикIин сидкьидай ва руьгьдиз таъсирдай тегьерда ЦIийи йис тебрикнай. Ада еке дамахдивди вичин юлдашрин крарикай гъалибвилихъ инанмишвал аваз кхьенай. Командирдин везифаяр четинбур жезвайди я. Вичин регьбервилик квай гьар са аскердин гьакъиндай жавабдарвал гьиссун, абур уьтквемвилелди женгиниз тухун, чIехи командиррин тапшуругъар ян тагана кьилиз акъудун регьят месэлаяр туширтIани, Марата вичин везифаяр кардин гъавурда аваз тамамарзавай. Ам аскервилин кьинез, Ватандиз эхиримжи нефесдалди вафалу хьана.
Баркаллу аскердин багърийриз ва мукьвабуруз, хажалат чIугунивди, башсагълугъвал гузва.
Марат хьтин лайихлу гадайри, итимри Ватандин аслу туширвал патал чпин чанар къурбанд авуни гъалибвал мукьвал алайдакай лугьузва. Чи уьлкведи ахьтин кьегьалар садрани рикIелай алуддач!”
* * *
Украинада военный махсус серенжемда иштиракзавай Мегьарамдхуьруьн райондин Гилийрин хуьряй тир Ибрагьим Османов Запорожьедин областда кьиле физвай женгера телеф хьана.
И.Османов гьуьлуьн пияда кьушунрин батальондин танкариз акси ракетаяр идара ийидай взводдин старший оператор тир. Нубатдин женгина душмандин гуьлледи адаз инсафнач.
Ибрагьиман 39 йис тир. КIвале адан уьмуьрдин юлдаш ва пуд аял ама.
Мегьарамдхуьруьн райондин чIехибуру администрациядин коллективдин ва райондин агьалийрин тIварунихъай аскердин хизандиз, багърийриз, мукьвабуруз ва дустариз башсагълугъвал гузва. Ватан патал чанар гайи игитар инсанрин рикIера эбеди я.
Хийир Эмиров
