Сагърай, лезги халкь!

Нубатдин йис тарихдиз хъфена. Чав 2023-йис агакьнава. Идалай виликни чна са макъалада къейднай: цIийи йиса чаз хейлин хъсан вакъиайрин иштиракчияр жедай мумкинвал гуда.

Гьа са чIавуз гьелелиг авай лап муракаб алакъайризни, шартIа­ризни, имтигьанризни къимет гана кIанзава. Гьакъикъатда чун виликрай виливни хуьн тавур дяведин шартIара гьатнава. Дуьньядин вири ампаяр, Американи Великобритания кьилеваз, фашизмдал чан хкана, чи гьунарлу ва гъейратлу халкьдал, чпин куьгьне кьисасарни гъибетар гваз, чун кIурарик кутаз, чи девлетрин иесивал ийиз кIанз, гьа­кьван чиркин ва залан дя­ве гваз сад хьанва. Украина  яракьламишзава, руьгьламишзава, украинви бан­дерчийринни нацистрин гъилералди чун ягъиз, зайифариз алахънава. Ихьтин шартIари чавай датIана  уяхвал, савадлувал, садвал, гъей-рат­лу­вал, ватандашвал ян тагана хуьн истемишзава. Чун гьахълу тир­дахъ, чун гъалибни же­дайдахъ инан­мишвал авун чи буржи я. И кардин кьиле авайбурукай сад печать — газетни журнал я.

“Лезги газетди” халкьдив уяхарунин, дуьньядикай ва жуван Ватандикай, гьар йикъан везифайрикай, четинвилерикайни агалкьунрикай вахт-вахтунда дуьз малуматар агакьарзава. Им чаз къе ядни фу хьиз герек я.

Газетди хайи чIал, меденият, эдебият, адетар, тарих чирун, хуьн, виликди тухун патал ийизвай кIва­лахни тарифлуди я. И рекьера чахъ 100 йисан тежриба хьанвайди гьисаба кьун кутугнава.

Газетни халкь сад хьайила, чавай вири месэлаяр, дердияр ре­гьят­даказ гьялиз жедайдал шак алач. И кар чи савадлу халкьдиз, адан гуьркем ва уьтквем, гьунарлу рухвайризни рушариз хъсандиз чизва. Гьавиляй газет хуьн патал, ам къуватлу ва мадни метлеблу авун патал жедай вири куьмекар гузва. ЦIини чи подписка республикадин вири газетрилай вилик ква! Им еке бахт ва агалкьун я. ГьикI хьи, и карди чун савадлу ва къудратлу тирдан шагьидвалзава. Савадлувилив агакьдай маса къуват авайди туш. Вири девирра вири агалкьунрин, гъалибвилерин бинеда савадлувал, дуьз информация, чирвилер хьайидал шак алач. Гилани гьакI я. Инлай кьулухъни чирвилерин чешмейрин къайгъуда хьуни чун хуьда ва виликди тухуда!

Чна газетдиз гьар жуьредин куьмекар гузвай вирибуруз мад сеферда рикIин сидкьидай сагърай лугьузва. Куь гьар садан кIвалера сагъвал, шадвал, гьуьрмет, берекат хьун чи мурад я.

13-январь, Печатдин  югъ — суварни вирибуруз мубаракрай!  Журналистринди тирди хьиз, ам газет кIелзавайбурун суварни я. “Лезги газет” кIвализ хтай югъ парабуру сувар яз гьисабзава. Къуй а сувар садрани зайиф тахьурай! Халкь далудихъ галай газет зайиф­ни жедач!..

“Лезги  газетдин” редакция.