Алатай гьафтеда Махачкъалада, Р.Гьам­затован тIварунихъ галай прос­пектда, “Дагпечатдин” цIийи кIалубда аваз гьазурнавай газетринни журналрин сад лагьай павильон (киоск) кардик акатна. Ам ахъаюниз талукьарнавай мярекатда РД-дин информациядин ва печатдин Агентстводин регьбер Абдуразакь Жамалутдинова, “Дагпечать” ГАУ-дин кьил Юсуп Хайдакьова ва масабуру иштиракна.

“Им вилик финин рекье къачунвай важиблу кам я. ЦIийи кIалубда аваз туь­кIуьрнавай павильонди “Дагпечатдин” тарихда цIийи де­вир алукьнавайди къалурзава. Печатдин про­дукция маса гузвай объектар шегьеррани районра гьи­кьван пара хьайитIа, газетарни журналар кIелунал рикI алай агьалийриз гьа­кьван къулай жеда. Дагъустандин Гьукуматди, Махачкъала шегьердин мэр Салман Да­даева, муниципалитетдин администрацийрин кьилевайбуруни и кардиз кьетIен фикир гузва”, — лагьана А.Жамалутдинова цIийи киоскдин къулайвилерикай рахадайла.

Къейд ийин хьи, газетрилайни жур­налри­лай гъейри, киоскдай канцеляриядин продукция, ктабар, ядигарар, савкьатар маса гуз­ва. Муьштерийривай павильонда чими кофени хъваз жеда.

Алай вахтунда Дагъустанда “Дагпечатдин” 56 киоск кардик ква. Абур Махачкъала, Каспийск, Къизилюрт, Къизляр, Буйнакск, Хасавюрт, Избербаш, Дербент, Дагъустандин Огни шегьерра, Мегьарамдхуьруьн, Ахцегь, СтIал Сулейманан, Ногъай ва Новолак районра, Дербент райондин Белиж поселокда ава.

Чи  мухбир