22-ноябрдиз “Дагъустандин правда” газетдин редакцияда РД-дин информациядин ва печатдин агентстводин регьбер Абдуразакь Жамалутдинов республикадин СМИ-рин векилрихъ галаз гуьруьшмиш хьана. Мярекат журналистри суалар гунилай башламишна.

Къейд авун лазим я хьи, эхиримжи варцара журналистрик, вири редакцияр сад авуна, медиахолдинг тешкилзава лугьузвай хабарди секинсузвал кутунвай. Идан гьакъиндай А. Жамалутдинова лагьана.

— Холдинг тешкилунин гьакъиндай чна республикадин вири газетрин редакторрихъ галаз меслятна. И кар чаз менфятлу яз аквазва. ГьикI лагьайтIа, вири редакцийрихъ кьилди юристар ва маса герек пешекарар кьадай мумкинвал авач. Холдингди редакцияр административный, майишатдин ва юридический месэлаяр гьялуникай азадда. Гьар редакциядихъ вичин редактор амукьда ва ам коллективни галаз анжах яратмишунин кардал машгъул жеда. Холдингди чаз хейлин къуллугъчияр (журналистар ваъ) тIи­милардай, мажибрин ва гонорардин кьадарар хкаждай (30-40 процентдин) мумкинвал гуда. ЦIийи къурулушдик милли чIала­рал акъатзавай журналар акатзавач. Хол­динг­дин гьакъиндай вири документар гьазурнава, РД-дин гьу­куматдин талукь управленидихъ галаз меслятдал атанва. Мукьвара махсус къарардал къулар чIугун лазим я.

Милли редакцияр авай дараматдин гьалдиз талукь яз Абдуразакь Абдул­ва­гьа­бовича малумарна хьи, алай вахтунда чIе­хи дараматдихъ тайин иеси авач. Гьавиляй­ ам агентстводин балансдал алудун патал герек вири жуьредин чарар туькIуьрнава. ЦIийи йис алукьдалди месэла гьялда.

— Ида чаз дарамат тамамвилелди ре­монт­дай мумкинвални гуда. ГьикI ла­гьай­­тIа, чун дараматдин юридический иесияр хьайила, журналринни газетрин комплекс ремонт авун республикадин ин­вес­ти­ций­рин программадик кутаз ва и кардиз бюджетдай пулар чара ийиз алахъда, — лагьана А.Жамалутдинова.

Гуьруьшдал милли газетрин тиражрикай, редакцийра кIвалахзавай инсанрин кьадарар сана тIимил, масана гзаф хьуникай, газетар подписка авуникай, кIелзавайбурун кьадарар тIимил хьуникай, районра ва шегьерра “Дагпечатдин” киоскар артухаруникай, редакцийриз жегьил пешекарар къведайвал авуникай, яргъал хуьрериз газетар лап геж агакьарзавайдакай ачухдиз ихтилат фена.

Киоскриз талукь яз агентстводин регьберди шегьеррин ва районрин муниципалитетри и месэла гьялуник чпин пай кутуна кIанза­вай­дакай лагьана.

Нариман Ибрагьимов