Гьикьван дертлу, гьайифдин кар ятIани, гьар са дяведи телефвилер, къурбандарни арадал гъизва. Украинада давам жезвай дяведин махсус серенжемда дагъустанвийри, халис игитвилер къалуруналди, Ватандин вилик чпин буржи намуслувилелди тамамарзава. Бязибур душмандин гуьллейрикни акатзава, госпиталриз аватзава, уьмуьрдивайни жезва. Ватандин аслу туширвал, азадвал патал чанар гайибур халкьди гьамиша рикIел хуьда.

Кьиблепатан Дагъустандин районрайни махсус серенжемда вишералди кьегьалри иштиракзава. Вучда кьван, кьетIен тапшуругъар тамамардайла, хкатайбурни ава.

Мегьарамдхуьруьн райондин Бут-Къазмайрин хуьряй тир Артур Ширинова дяведин махсус серенжемда гьа сифте йикъарилай иштиракзавай. Ада 3-ротада пулеметчик яз къуллугъзавай. Шад, регьимлу, вичин кар чидай жегьил гьамиша юлдашриз куьмек гузни гьазур тир. И кар чизвай ротадин командир, старший лейтенант Руслан Алиева къейдзавайвал, Артур Ширинов масадбуруз гьар са рекьяй чешне яз къалуриз жедай аскер тир.

2022-йисан сентябрдин эхирра Херсондин областдин Брод поселокдин са дараматда Россиядин армиядин 94-полкунин аскерар акъвазнавай. Украинадин фашистри поселок тупарай яна. Чи аскерар авай кIвалихъни галукьна, дарамат чкIана, аскерар плитайрик акатна. Ширинов Артур сифтебурун жергеда аваз юлдашриз куьмек гуз фена. Ада са шумуд аскер завалдикай хкудна. Амма нубатдин сеферда боевикрин гьужумдик акатай Ширинов телеф хьана.

Гьелбетда, Ширинован викIегьвал такуна амукьнач. Полкунин командованиди ам гьукуматдин шабагь гун патал къалурна.  Президент Владимир Путинан указдалди аскердин игитвал (телеф хьайидалай кьулухъ) «Жуьрэтлувилин» орден гуналди къейдна.

Хуьруьнвийри, дустари кьегьал хва рикIел хуьн, жаванриз, акьалтзавай несилдиз чешне яз къалурун патал адан тIвар ва кар рикIера амукьдайвал ийизва. Хуьруьн са куьчедиз Ширинован тIвар гана, ана мемориалдин кьулни эцигна.

Абад  Азадов