СтIал Сулейманан райондай тир Мегьтиханов­рин хизандин векилри халкьдин майишатдин жуьреба-жуьре хилера гьакъисагъвилелди зегьмет­ чIугвазва. Гьина кIвалахзаватIани, абуру чпикай хъсан майилар тазва. Къейд авун лазим я хьи, Мегьтихановрин тухумда медицинадиз, инсанрин сагъламвал мягькемаруниз чпин уьмуьр бахшнавай векилар гзаф ава. Сифте нубатда Ватандин ЧIехи дяведин йисара Берлиндиз кьван фейи медицинадин­ къуллугъдин капитан Жамалдин Мегьтиханован тIвар кьаз кIанзава. Ада фашистрихъ галаз женг чIуг­вазвай Яру Армиядин гзаф аскерар кьиникьикай къутармишна.

Къе халкьдин сагъламвилин къуллугъда адан хтул Абдул Мегьтиханов акъвазнава. 2019-йисалай­ республикадин ТФОМС-да зегьмет чIугвазвай ам коллективдиз, здравоохраненидин министерст­во­дин къуллугъчийризни лап хъсан пешекар, вири­да гьуьрметзавай инсан яз чида. Ада уьмуьрдин юлдашдихъ галаз санал хизанди пуд аялдиз тербия­ гузва.

ТФОМС-дин къуллугъчи Абдул Мегьтиханова, чIехи бубадин женгерин рекьер рикIел хкана, дяведин махсус серенжемдиз фин кьетIна. «Зун жуван хайи макан, чIехи уьлкве кIандай инсанрикай я. Дяведин махсус серенжемда зи танишри, кIвалахдин юлдашри иштиракзава. Зун ара-ара абурухъ галаз рахазвай. Абуру заз пешекар духтурар бес тежезвайдакай лугьузвай. Алатай йисара за хирургвилин хъсан тежриба кIватIнава. Чи аскерризни хийир­ хкатдайвал, заз виридан гьахълу кардик жуван пайни кутун хъсан акуна. Гьар юкъуз чпин уьмуьр хаталувилик кутаз, Ватандин итижар хуьзвайбуруз куьмек гана кIанда. Гьа ихьтин фикир аваз, зун жуван юлдашрин патав физва», — лагьана Абдул Мегьтиханова ТФОМС-дин пресс-къуллугъдин векилдиз.

Халис ватанперес, баркаллу бубайрин кардиз вафалу хва тир Мегьтиханов махсус серенжемдиз ТФОМС-дин директор Агьмед Гудова, Дагъустан Республикадин Халкьдин Собранидин депутат Абдулла Мегьамедова, багърийри, кIвалахдин юлдашри рекье туна.

Абад Азадов