8-июлдиз, чи уьлкведа къейдзавай Хизандин, муьгьуьббатдин ва вафалувилин йикъан сергьятра аваз, Дагъустандин Кьил С. Меликов СВО-дин иштиракчийрин, санал яшамиш жез 25 йисалай виниз вахт алатнавай диде-бубайрихъ галаз гуьруьшмиш хьана. Яргъал йисара санал яшамиш жезвай чешнелу хизанар тебрик авун хъсан адетдиз элкъвенва.
И юкъуз тебрикдин чими келимаяр агакьайбурун арада ава: Сергокъала райондай тир Мегьамед-Гьабиб ва Меседу Мегьамедовар, абур санал яшамиш жез 44 я. Мегьамед-Гьабиб Шапиевича хайи Кичигамри хуьре духтур яз кIвалахзава, Меседу Куругълиевнади — чкадин администрацияда; Мегьарамдхуьруьн райондай тир Эседуллагь ва Герекмаз Селимовар санал яшамиш жез 38 йис я, абуру райондин уьмуьрда активнидаказ иштиракзава. Э. Селимова райадминистрациядин культурадин отделдиз регьбервал гузва, Г. Селимова духтур я; Исамутдин ва Гьаписат Мегьамедовар Каспийскда гзаф аялар авай ва зегьметкеш хизанрикай сад я, абуру 4 аялдиз тербия гана; Каспийскдай тир Альберт ва Суна Набиевар — Россиядин Игит Энвер Набиеван бубани диде; Хасмегьамед ва Гуьлисат Муслимовар Ахвах райондай я, абур санал яшамиш жез — 44 йис; Абдулгьамид ва Гуьлгес Халикьовар Табасаран райондай я, абуру чпин аялар ватанпересвилин руьгьдаллаз тербияламишна; Хив райондай тир Беглер ва Беневша Кибероварни ватан хуьдайбур чIехи авунвай мад са хизан я, абурун 3 хци СВО-да иштиракзава.
Гуьруьш ачухдайла, региондин Кьили къейд авурвал, Хизандин, муьгьуьббатдин ва вафалувилин йикъан шикил, сифте килигайла, адетдинди хьиз аквада, амма ана гьар са инсан патал виридалайни важиблу ивирар ава: хизан, кIвал, багъри ксар, муьгьуьббат, къайгъударвал.
«Сифте нубатда, гьелбетда, за яргъал йисара санал яшамиш хьанвай хизанар тебрикзава. Куь чешнедалди куьне, арада муьгьуьббат ва вафалувал аваз, хизандин ивирар мягькемарун къалурна. Гьелбетда, гзаф аялар чIехи авунвай хизанриз за кьетIендаказ сагърай лугьузва. Руьгьдин жумартлувиляй, сабурлувиляй ва хъсанвиляй.
Ватан патал четин вахтунда гзаф хизанрай, гьа гьисабдай яз куь хизанрайни тир куь рухвайрикай, стхайрикай ва уьмуьрдин юлдашрикай дяведин махсус серенжемдин иштиракчияр хьана. Жуьрэтлу ва дирибаш ватандашрал чна дамахзава. Абур — чпи кьилиз акъудзавай къуллугъдай, куьн — абуруз ихтибарлу далу-пад таъминарунай, куьмек гунай ва чи умуми гъалибвилик пай кутунай сагърай», — лагьана региондин Кьили.
С. Меликова СВО-да иштиракзавай дагъустанвийрин гьар са хизандиз вири патарихъай куьмекар гудайдахъ инанмишарна. Ада Россиядин Президентди военный рекьяй къуллугъчийрин хизанриз куьмекар гун ва СВО-дин иштиракчийрин яшайишдин рекьяй заминвилерин къурулуш мягькемарун чи виридан везифа тирди са шумудра къейд авурди рикIел хкана.
И юкъуз республикадин Кьили чухсагъулдин чарар ва рикIел аламукьдай пишкешар гана. Сергей Меликова гуьруьшдин иштиракчийрин чими келимайрихъ ва тIалабунрихъни яб акална. Абур гуьзчивилик кутунва.
Гуьруьшдин иштиракчийри республикадин регьбердиз и югъ тебрик авунай сагърай лагьана.
Чи мухбир
