Дуьньядал виридалай пакбур­ сад — диде, сад Ватан я. Гьар са кас вичин Ватан хуьз гьазур я. Мегьарамдхуьруьн райондин­ Къуюстанрин хуьрени гьахьтин рухваяр хьана. Ахьтинбурукай сад Алиев Султанмежид Угунбегович тир. Са шумуд сеферда ажалдин къармахрай акъатай кьегьал хва  кIвачер галамачиз хуьруьз хтанай.

Алиев Султанмежид 1906-йисуз кесиб хизанда дидедиз хьанай. Ам лежбер тир. Ада колхозда кIвалахзавай ва вичин майишат вилик тухузвай. Султанмежидахъ ругуд аял авай. Ватандин ЧIехи дяве башламишдалди, ам фермадин заведующий тир. 1941-йисуз ам дяведиз тухвана. Аскерди Москвадин ва Смоленскдин патарив хьайи женгера иштиракнай.

Мекьи вахт тир. Аскерри тама чилин къазмада ял язавай. Султанмежид пIапIрус чIугваз экъечIнавай. Хабарсуз цавай нем­серин бомбардировщикар атана, къазмадал бомбаяр вегьена. Вири аскерар телеф хьана, амма Султанмежид са патахъди гадар хьана. Адал гъвечIи хирер хьанай. Гьа и чIавуз ам тама къанни са юкъуз я фу, я яд, я куьмек авачиз амукьнай. Масадакай чара тежедайди чир хьайила, ада вичи-вичиз куьмекнай. Юкъуз набатат­рин дувулар жагъуриз нез, йиф алукьайла, тарциз акьахна, ават тавун па­тал вичи­ ­вич чIулуналди тарцел кутIунна, ксудай. Вахт мекьиди хьуниз килигна, адан кIвачер къаю тухвана. ГьикI ятIани, тама алерар галай кицIер къекъвезваз хьанай. Абуру хирер хьанвайбур жагъурзавай. Султанмежид абуруз жагъа­на ва госпиталдиз хутахнай. Госпиталда адан кIвачер атIанай. 1943-йисан эхирдай Султанмежид буба вичин ватандиз сад лагьай группадин инва­лид яз рахкурнай. Хуьруьз хтай адан рикIел хер хьана, вучиз лагьай­тIа, кIваликай затIни амачир. Пабни кьуд аял кьена, амай кьве аялни миресрив гвай.

Вахтар алатна. 1952-йисуз гьукуматди адаз кьве касдин чка авай машин ганай. Ахпа ада хуьруьн складдин заведующийвал авунай. Алиев Султанмежид Яру Гъетрен, Ватандин дяведин I ва II дережайрин орденрин сагьиб тир.

Султанмежид бу­ба кьвед лагьай сеферда Ифриз Абдулвагьабовнадал эвленмиш хьанай. Ифриза дяведин вахтунда далу пата зегьмет чIугунай. Ам 1916-йисуз Къуюстанрин хуьре дидедиз хьанай. Дяведин вахтунда Ифриза яшлу итимрихъ галаз Хасав­юртдин ва Къизлярдин районра­ марфарикни живерик окопар эгъуьн­най. КIва­лахдилай гуьгъуьниз абуру са чилин къазмада йиф акъуд­дай. Сад-садак агатна, чими ийидай. Са тике фу къазанмишун паталди абуру экуьнилай няналди зегьмет чIуг­вадай.

Дяведилай гуьгъуьниз абуруз ругуд аял, чешнелу хизан хьанай.

Чи Ватандал гьамиша — михьи цав ва ислягьвал, акьалтзавай несилар Ватандин къадир авайбур хьурай!

Зоя  Алиметова,

Мегьарамдхуьруьн райондин

Къуюстанрин мектебдин лезги чIаланни литературадин муаллим