РД-дин Гьукуматдин Председателдин заместитель Нариман Абдулмуталибова ва РД-дин тамарин майишатдин крарай Комитетдин председатель Вагьаб Абдулгьамидова Кьасумхуьрел аскервилин баркалладин “Эбеди цIай” обелискдин патав кьиле фейи “РикIел хуьнин багъ” серенжемда иштиракна.
“РикIел хуьнин багъ” серенжемди Россиядин ва вири дуьньядин къайгъусуз тушир виш агъзурралди агьалияр фашизмдихъ ва миллетчивилихъ галаз женгина чпин чанар гайибурун тIварар эбеди яз хуьнин фикирдал сад ийизва. Серенжем экологиядин жигьетдай хцидаказ акъвазнавай месэлаяр гьялунихъ — жемятди ишлемишзавай чкайра, яшайишдин кIвалерин арайра тарар цун,тамар гуьнгуьна хтун ва дуьньядал яшайишдин ери хъсанарун — элкъуьрнава.
Муниципалитет патал важиблу мярекатда райондин кьил Саид Темирханова, райондин са жерге идарайрин къуллугъчийри, санлай къачурла, 80-далай гзаф ксари иштиракна.
Мярекат кьиле физвай вахтунда обелискдин патарив 80 тар, гьа жергедай яз туядин 40 къелем ва верхин 40 къелем цана.
“Гьеле 2020-йисуз уьлкведин Президентди “РикIел хуьнин багъ” серенжемдикай хабар ганай. Адан сергьятра аваз, Ватандин ЧIехи дяведин йисара телеф хьайи 27 миллион кас къурбандар эбеди рикIел хуьнин лишан яз, 27 миллион тар цун пландик кутунвай. Саналди тир къуватралди чна неинки и макьсаддив агакьарна, гьатта ам артухни алаз тамамарна. Къенин юкъуз, чи уьлкведи Украина миллетчийрикай азад авунин серенжем кьиле тухузвайла, и серенжемдин важиблувал мадни артух хьанва. Вири уьлкведа 100 миллиондилай гзаф тарар цанва. Гьелбетда, къе уьлкведихъ чи чIехи бубайрин къаматдиз хьиз гьуьрмет авуниз лайихлу цIийи игитар ава. Къе чалай серенжем СтIал Сулейманан районда кьиле тухуз алакьнава. 22-июндалди проектдик чи республикадин амай районарни экечIда”, — лагьана Н.Абдулмуталибова.
Чи мухбир
