“Дагъустан” РИА-да журналистрихъ галаз хьайи гуьруьшдал РД-дин ту­ризм­дин, художественный сеняткарвилерин рекьяй министр Эмин Мер­данова международный туриствилин MITT 2023 выставкадин нетижайрикай, алукьзавай туриствилин сезондиз гьазурвал акуникай, гьакIни  2022-йисан нетижайрикай суьгьбетна.

Малум хьайивал, Дагъустан Республика  29 лагьай сеферда кьиле тухвай международный туриствилин  MITT 2023 выставкадин стратегиядин жи­гьет­­дай амадаг тир. Дагъустандин  Мин­­ту­ризмди  чIехи экспозиция гьазурнавай. Адан программа Расул Гьамзатован 100 йис тамам хьун къейд авуниз талукьарнавай. РикIел хкин, MITT и сеферда выставкайрин  “Крокус Экспо” центрада кьиле фена. Россиядин виридалайни чIехи мярекат тир иниз  туриствилин бизнесдихъ галаз алакъа­лу гзаф ксар кIватI жезва.

Дагъустандин патай и выставкада 27 туроператорди, мугьманханайрин ие­сийри ва республикадин туриствилинни сагъламардай комплексдин векилри  иштиракна. Абуру выставкадин иштиракчийриз, мугьманриз  республикадихъ ял ягъунин ва сиягьат авунин жигьетдай авай мумкинвилерикай, маш­гьур чкайрикай, гьакIни Дагъустандин тIуьнрикай, продуктрикай, художественный сеняткарвилерикай суьгьбетна. Санлай къачурла, министрди хабар гайивал, Дагъустан Республикадин экспозициядиз (ам дагъдин хуьруьн кIвал хьиз туькIуьрнавай)  5 агъзурдалай гзаф ксар мугьман хьана. Нетижада 80-далай гзаф икьрарар кутIуннава, Россиядин маса регионрин туроператоррихъ галаз алакъаяр тайинарнава.

“Гьелбетда, Дагъустандин стендди гзаф инсанрин фикир желбна. Чун ана фольклордин ансамблрин иштираквал тешкилай тек са регион я. Идалди чна чи культурадин девлетлувал ра­ижна”, —  лагьана идарадин кьили.

Гуьгъуьнлай Эмин Мерданов туризмдин хилез куьмек гунин серенжемрикай рахана. Ада къейд авурвал, республикада ял ягъиз кIандайбурун кьадар, ала­тай йисарив гекъигайла, виле акьадайвал гзаф хьанва. Гьаниз килигна мугь­­манханайрин кьадар гзафарунин, къурулушар хъсанарунин игьтияж арадал атанва. Министрдин гафаралди, им  бизнес ва чпин хсуси кар гъиле кьаз кIан­завай­бур патал лап хъсан мумкинвал я.

“Чна лагьайтIа, бизнесдиз куьмек гун патал са жерге серенжемар гьазурнава, туриствилин месэладиз талукь яз  чкайрилай къвезвай теклифрин конкурс кьиле тухвана. Адан нетижада Дер­бент, Къарабудахкент районра ва Махачкъалада  гьуьлуьн кьере къулайвилер арадал гъанва. Идалайни гъейри, Къарадагъдин гуьтIуь чкада хатасузвилин система кардик кутунва,  Сал­та чарчардал ва туристрин рикI алай маса чкайриз къулайдаказ фидай рекьер туькIуьрнава. Ихьтин кIвалахар давам жезва”, — лагьана ада.

Туриствилин сезондиз гьазурвал акунин сергьятра аваз, РД-дин Минтуризмди гьар йисуз гидрин аттестация кьиле тухузва. Къенин юкъуз республикада аттестация авун патал 92 касди арзаяр вуганва.

“Гиддин пешекарвилин дережадилай Дагъустандикай туристрин рикIера  гьихьтин фикирар амукьдатIа, гьам ас­лу я. Чахъ савадлу, бажарагълу ва пе­ше­­кар гидар тIимил авач. Абурувай не­инки машгьур чкайрикай кьезилдаказ суьгьбет ийиз, гьакIни эсиллагь таниш ту­шир Да­гъустан — акьалтIай гуьзел, ам­­­­ма икьван чIавалди гзаф фикир таганвай чкаяр къалуриз жезва”, — къейдна министрди.

Апрелдилай ноябрдалди Минтуризмди “Эко-тур” проектдин сергьятра аваз, экологиядиз талукь 24 серенжем кьиле тухун пландик кутунва.

Жасмина Саидова