Мегьарамдхуьруьн райондин Агъа Хъартасрин хуьруьн администрацияда Ватандилай къецепата къуллугъдин буржи тамамардайла телеф хьайибур рикIел хуьнин югъ лишанлудаказ къейдна.
Мярекат ачухай хуьруьн собранидин депутат Гьарунов Мирзамегьамеда райондай Афгъанистандиз, интернационалиствилин буржи кьилиз акъудиз, 103 кас фейидакай ва абуру чпин вилик эцигай везифаяр намуслувилелди, жуьрэтлувилелди тамамарайдакай лагьана.
Агъа Хъартасрин администрациядин кьил Нагъиев Омара хуьряй, интернационалиствилин буржи кьилиз акъудиз, ирид кас фейиди къейдна.
— Чна абурун крарал дамахзава. Магьмудов Нигредуллагьа, Эмирсадикьов Мегьамедшафиди, Жалилов Къазимегьамеда, Салигьов Эрика, Герейханов Тельмана ва Велибегов Айнудина командиррин тапшуругъар викIегьвилелди тамамарна. Абур орденриз, медалриз лайихлу хьана. Къе чи арада кьве “афгъанви” амач, абуруз рагьмет хьурай. Чна абур гьамиша рикIел хуьда. Кьегьал рухваяр акьалтзавай несилдиз чешне я.
“Афгъанвийриз” чпин югъ райондин общественный палатадин векил Шихкерим Шагьпазова, хуьруьн агъсакъалрин советдин председатель Гьасан Гьасанова тебрикна ва абуру алай вахтунда жаванриз ватанпересвилин тербия гунин карда «афгъанвийри» тухузвай общественный кIвалах къейдна.
Афгъанистандин чилел чпи иштиракай женгерикай М. Эмирсадикьова ва Э. Салигьова суьгьбетна.
КIватI хьанвайбуруз эхирдай концерт гана. Хуьруьн администрацияди “афгъанвийриз” суварин суфраяр ачухна, абурув пишкешар вахкана…
Абад Азадов
