Ктабар чапун коммерциядин месэладиз элкъвенвай, районра ктабрин туьквенар амачир вахтунда инсанриз милли литературадин яратмишунар, гьайиф хьи, саки жагъизвач. Важиблуди тир и месэла гьялуник къуьн кутун, хайи эдебиятдал рикI алай ксарин руьгьдин игьтияжар алакьдайвал таъминарун Сулейман-Стальский райондин милли меденият хуьнин мергьяматлувилин “Агъа Макьар” фондуни хушуналди вичин хивез къачунва.
И мукьвара “Агъа Макьар” фондунин векил, Кьасумхуьруьн телевиденидин мухбир Мизамудин Магьмудова Ахцегь райондин хуьрерин ва образованидин къурулушдин библиотекаяр патал лезгийрин машгьур шаир, прозаик ва публицист, Дагъустандин культурадин лайихлу къуллугъчи Пакизат Фатуллаевадин вишелай артух “Ишараяр”, “Чешне” ва “Таржумаяр” тIварар алай ктабар гъана, пишкешна.
Кьиблепатан районрин библиотекайриз лагьайтIа, 1000 ктаб ганва. Ихьтин жумарт кардай Ахцегь райондин руководстводи мергьяматлувилин “Агъа Макьар” фондунин председателдиз ва векилриз чухсагъул малумарзава.
Милли меденият хуьнин мергьяматлувилин “Агъа Макьар” фондуни, лезги халкьдин культура вилик тухунин пара месэлайра иштиракиз, вичелай алакьдай пай кутазва. Кьилди къачуртIа, СтIал Сулейманан юбилейдиз, “Шарвили” эпосдин сувариз талукь яз махсус значокар акъудна, халкьдин хийирдин маса крарани жумартвал къалурзава.
Дашдемир Шерифалиев
